Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 234 Hüküm no: 353 Orijinal metin no: [83b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed b. İskender’in karısına ait firkatenin dörtte bir hissesinin beytülmal emini tarafından iade edildiği Oldur ki Mahmiye-i Galata hâricinde Bedreddin nâm mahalle sâkinlerinden olup fevt olan Mehmed b. İskender’in zevcesi olan Emine Hâtun bt. Abdullah müteveffâ-yı mezbûrun metrûkâtına vaz‘-ı yed eden emîn-i beytülmâl-i hâssa Musa Çavuş mahzarında takrîr-i kelâm edip müteveffâ-yı mezkûr zevcime bundan akdem on iki bin akçe verip hâl-i hayâtında taleb eylediğimde cevâb verip dedi ki binâ eylediğim firkatenin rub‘ hissesi bana verdiğin on iki bin akçe mukābelesinde senin olsun ve sana verdim dedikde ben dahi kabûl eyledim. Hâlâ mezkûr emîn-i beytülmâl tasarrufuma mâni‘ olur görülsün dedikde emîn-i mezkûr inkâr ile cevâb vermeğin sıdk-ı makāline muvâfık beyyine taleb olunup udûl-i müslimînden es-Seyyid Abdurrahman b. es-Seyyid Sefer ve Ali b. İbrahim el-Müezzin ve Mehmed b. Abdurrahman es-Seyyid ve Şehâbeddin b. Ali li ecli’ş-şehâde hâzırûn olup mezkûrenin sıdk-ı makāline muvâfık edâ-i şehâdet edip müteveffâ-yı mezkûr bizim yanımızda mezkûre hâtuna on iki bin akçesi mukābelesinde mezkûr firkatenin rub‘unu verdi. Ve bizi işhâd eyledi. Şâhidleriz ve şehâdet dahi ederiz dedikde bi’t-taleb kayd-ı defter olundu. ( ) sene 999. Şuhûdü’l-hâl: Hacı Piyâle b. Abdullah, Ahmed Bey [b.] Abdullah el-Cündî, Hasan Bey b. Abdullah, Memi b. Abdullah er-Reis, Mustafa.