Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 239 Hüküm no: 363 Orijinal metin no: [84b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Mehmed’in, Yusuf adlı kölesini azat ettiği Mahmiye-i Galata’da Azeblerkapısı’nda sâkin olan Mustafa b. Mehmed nâm kimesne meclis-i şer‘-i şerîfe hâzır olup işbu kasîrü’l-kāme, kara gözlü, kara kaşlı, sol tarafında ağzına karîb yerde eser-i cerâhati olup Gürciyyü’l-asl olan hâmil-i hâze’l-kitâb abd-i memlûkü mahzarında takrîr-i kelâm ve bast-ı merâm edip bundan akdem Yahya b. İbrahim nâm müteveffâ ile hâl-i hayâtında ve kemâl-i sıhhatinde müşâ‘ ve müşterek olduğum mevsûf-ı mezbûr Yusuf’u târih-i kitâbdan mukaddem tedbîr-i mutlak ile müdebber eyledim deyû bi’t-tav‘ ve’r-rızâ ikrâr ve i‘tirâf eyledikde mukırr-ı mezbûr Mustafa Bey vech-i meşrûh üzre olan ikrârını mukarrun-lehü’l-mesfûr Yusuf vicâhen ve şifâhen tasdîk ve tahkīk edip vâki‘ hâl bi’t-taleb tahrîr ve tenmîk olunup vaz‘ ve def‘ olundu. Tâlibi yedine vakt-i hâcetde ihticâc edine. Tahrîren fî evâsıtı şehri Recebi’l-mürecceb sene tis‘a ve tis‘în ve tis‘a mi’e. Şuhûdü’l-hâl: Derviş Abdi el-Muhzır, el-Hâc Nurullah b. Hüseyin, Hızır b. İsmail, Receb b. Abdullah ve gayruhüm mine’l-hâzırîn.