Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 240 Hüküm no: 365 Orijinal metin no: [85a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman’dan kalan evin, vârisler tarafından Memi b. Abdullah’a satıldığı Bundan akdem mahmiye-i Galata hâricinde merhûm Muhyiddin Çelebi mahallesi sâkinlerinden olup fevt olan Osman mezbûr Mehmed’in oğlu olan Mustafa ve merhûmun kızı Sabiha tarafından vekâleti bimâ hüve tarîkü’s-sübût sâbite olan merkūmenin zevci Musa b. Nasuh mahfil-i şer‘-i şerîfde hâmilü’l-hurûf Memi b. Abdullah mahzarında takrîr-i kelâm kılıp sâbıkan kıbel-i şer‘den vasîmiz olan Musa b. Mehmed merhûm babamızdan irs-i şer‘le intikāl eyleyen inde’l-cîrân ma‘lûmetü’l-hudûd mülk-i mevrûs dârımızı vesâyeti hasebiyle noksan bahâ dört bin akçeye bey‘-i bât ile mezkûr Memi’ye bey‘ edip biz dahi ziyâde bahâ eder deyû da‘vâ ve taleb eylemeğin hâlâ müslimûn-ı muslihûn tavassut edip dört bin akçe dahi alıverip mâbeynimizi ıslâh eylemeğin sulh-ı mezkûru biz dahi kabûl eyledik dediklerinde bi’l-muvâcehe tasdîk etmeğin mâ vaka‘a bi’t-taleb kayd-ı sicil olundu. Sene 999. Şuhûdü’l-hâl: Ali b. Abdullah, Mehmed b. İbrahim, Musa b. Nasuh, Süleyman b. Abdullah, Cafer b. Abdullah, Nasuh b. Abdullah, Sinan b. Musa, Musa b. İsa, Pîrî b. Hamza, Kasım b. Abdullah ve gayruhüm.