Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 241 Hüküm no: 367 Orijinal metin no: [85a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Keyvan b. Abdullah’ın, ölen Ömer Ağa’nın kardeşi olduğu Havâss-ı Kostantıniyye’de hâkim-i adl hazretlerinin kıyâm-ı ikdâm-ı hayr-encâmlarına ve takrîr-i mekârim-i kirâm ve nüvvâb-ı zevi’l-ihtirâmın âlî makāmlarına arz-ı i‘lâm-ı efkarü’l-enâm budur ki sâbıkan Barça sâkinlerinden olup hâlâ Kostantıniyye’de sâkin olan Keyvan b. Abdullah nâm sipâhi tarafından vekâleti sâbit olan Budin yaya başılarından Abdi b. Musa nâm subaşı meclis-i şer‘-i şerîfde da‘vâ-yı sahîha ve istişhâd-ı şer‘î sudûrundan sonra udûl-i müslimîn ve sikāt-ı muvahhidînden Hasan Kethüdâ ve diğer Hasan el-Mustahfız nâm kimesneler nakl ve tahvîl için mahall-i cerh ve ta‘dîlde edâ-i şehâdet-i şer‘iyye edip dediler ki şâhidleriz şehâdet dahi ederiz ki sâbıkan Barça’da sâkin hâlen nefs-i Kostantıniyye’de Mehmed Paşa Hazretleri’nin terzibaşısı olup vefât eden Abdullah oğlu Ömer Ağa nâm kimesnenin mezkûr Keyvan Sipâhi karındaşı oğludur deyû şehâdet-i şer‘iyye ettiklerinden sonra şehâdetleri hayyiz-i kabûlde vâki‘ mâ vaka‘a gubâr-ı pâ-yı sa‘âdet-medârlarına merfû‘ kılındı eltâf ve i‘tâklarından me’mûl ve mes’ûlümdür kitâb-ı sarf-ı uyûnun mazmûnu ve meknûnu makbûl-i şerîfleri olup indallâhi’l-gafûr me’cûr olalar. Cerâ zâlike ve hurrire fî evâhiri Cumâdelûlâ min şühûri sene tis‘a ve tis‘în ve tis‘a mi’e. Şuhûdü’t-tarîk: Cafer Ağa, Osman Kethüdâ, Hüseyin Kethüdâ. Minhâ’l-hakīr ilâ meclisihim el-hatîr Hasan el-müvellâ bi kazâi Grijgal ve Barça hilâfeten.