Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 241 Hüküm no: 368 Orijinal metin no: [85b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Nebi b. Yusuf’un, dükkanını Nasuh b. Habib’e sattığı Mahmiye-i Galata müzâfâtından Kasımpaşa mahallâtından Hacı Ferhad mahallesinden olup vefât eden merhûm Nebi b. Yusuf nâm reisin karındaşı oğlu olan işbu hâmilü’l-kitâb Nasuh b. Habib meclis-i şer‘a hâzır olup merhûm-ı mezbûrun muhallefâtına vazı‘ü’l-yed olan fahrü’l-ümenâ mahmiye-i mezbûrede beytülmâl emîni olan Musa Çavuş mahzarında takrîr-i da‘vâ edip bundan akdem ammim Nebi Yusuf’dan on iki bin akçeye iştirâ eylediğim ma‘lûmü’l-hudûd dükkânın akçesini teslîm eylemedim deyû emîn-i mûmâ-ileyh tasarrufuma mâni‘ olur dedikde gıbbe’s-suâl Musa Çavuş mezbûr Nasuh’dan husûs-ı mezbûra şâhid taleb eyledikde udûl-i müslimînden mahalle-i merkūmede el-Hâc Ferhad b. Abdullah ve Muzaffer b. Hasan nâm kimesneler li ecli’ş-şehâde hâzırân olup emîn-i mezbûr Musa Çavuş mezbûr muvâcehesinde edâ-i şehâdet-i şer‘iyye edip fi’l-hakīka mezbûr Nasuh b. Habib müteveffâ-yı mezbûr ammisi Nebi’den hâl-i hayâtında ve kemâl-i sıhhatinde ta‘rîf ve tahdîdden müstağnî olan ma‘lûmetü’l-hudûd dükkânı bizim huzûrumuzda on iki bin akçeye iştirâ eyledi ve meblağ-ı merkūmu dahi bizim huzûrumuzda bâyi‘-i mezbûr Nebi’ye teslîm eyledi. Husûs-ı mezbûra şâhidleriz, şehâdet dahi ederiz dediklerinde ba‘de’t-ta‘dîl şehâdetleri hayyiz-i kabûlde vâki‘ olup vâki‘ hâl bi’t-taleb kayd-ı sicil olundu. Fî 15 Ramazân sene 999. Şuhûdü’l-hâl: Mehmed b. İzzet Dellâl, Mevlânâ Ahmed b. Veli el-Müezzin, fahrü’l-akrân Ahmed Çavuş, Mevlânâ Hasan el-İmâm, İbrahim b. Mehmed, Mustafa eş-şehîr bi Gözbaşı?, Hasan b. Şükrullah, Hüseyin b. Hasan, fahrü’l-akrân Mustafa Çavuş b. Turhan ve gayruhüm mine’l-hâzırîn.