Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 242 Hüküm no: 369 Orijinal metin no: [85b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Reis b. Mehmed’in evini, Süleyman Reis b. Ahmed’e sattığı Oldur ki Mahmiye-i Galata dâhilinde Sinan Reis mahallesinde Ali Reis b. Mehmed meclis-i şer‘-i şerîfde mahmiye-i mezbûreden olup vefât eden merhûm Süleyman Reis b. Ahmed’in karındaşı olan Yunus b. Ahmed’den istişhâd-ı şer‘î sudûrundan sonra Rahime bt. İbrahim tarafından şer‘an vekâleti sâbite olan Nefîse bt. Mehmed mahzarında takrîr-i kelâm ve bast-ı merâm edip bundan akdem merhûm-ı mezbûr Süleyman Reis hâl-i hayâtında ve kemâl-i sıhhatinde beni ve birkaç kimesneyi kendi murâd[ı ile] da‘vet edip kapısı önüne vardıkda mezbûr Süleyman Reis takrîr-i merâm edip kayınanam mezbûre Rahime Hâtun taht-ı tasarrufunda olan ma‘lûmetü’l-hudûd mülk menzilini kırk bin akçeye bey‘ eyledi dedikde ba‘dehû kapı dâhilinde bir hâtun dahi mezbûr Süleyman Reis’in takrîrine muvâfık tahkīk-i kelâm edip taht-ı tasarrufumda olan mülk menzilimi Süleyman Reis’e kırk bin akçeye bey‘ eyledim. Merkūme Nefîse Hâtun’u vekîl eyledim. Siz dahi şâhid olunuz, husûs-ı mezbûra hüccet verilsin dedi. Lâkin ne müvekkile-i mezbûre Rahime Hâtun’u gördüm ve ne vekîl olan Nefîse’yi bilirim deyû bi tarîki’ş-şehâde haber verdiği bâ‘isden ol ki vâki‘ hâldir. Bi’t-taleb tahrîr olundu. Tahrîren fî evâhiri Receb sene 999. Şuhûdü’l-hâl: Fahrü’l-akrân Ahmed Çavuş el-Mübâşir, Sadi Reis b. Hamza, Musa b. el-Hâc Mahmud, Mehmed b. Mustafa, Süleyman b. Mehmed, Mehmed b. Sinan Reis ve gayruhüm mine’l-hâzırîn.