Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 246 Hüküm no: 378 Orijinal metin no: [86b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nisâ Hâtun’un, Manol v. Karali’ye mülk satışından doğan ihtilafın giderildiği Mahmiye-i Galata mahallâtından Şehsuvar mahallesi sâkinlerinden olup merhûm Ali Reis utekāsından olan Ali b. Abdullah nâm reis ve Mustafa b. Abdullah ve Cafer b. Abdullah şehâdetleriyle merhûm-ı mezbûr Ali Reis’in sulbiye kızı Nisâ Hâtun tarafından ikrâr-ı âti’z-zikre şer‘an vekâleti sâbite olan fahrü’l-akrân Mevlânâ Seyyid Abdullah meclis-i şer‘a hâzır olup işbu hâmilü’l-kitâb Manol v. Karali nâm zimmî mahzarında bi’l-vekâle takrîr-i kelâm ve bast-ı merâm edip beni vekîl kılan? mezbûre Nisâ Hâtun’a babası Ali Reis’den irsle intikāl edip bir tarafı Kapı Ağası vakfı olan fırına ve bir tarafı âhar vakfa ve bir cânibi tarîk-i âma ve cânib-i âharı Aleksandr Kozma zimmî mülküne muttasıl olup bir bâb fevkānî beyti ve tahtında mahzen ve eşcâr-ı müsmireyi müştemil cüneyneyi ve bi’r-i mâyı ve kenîfi hâvî olan menzilini mezbûre Nisâ Hâtun sagīre iken babası Ali Reis utekāsından Hüsrev b. Abdullah nâm lalası vesâyeti hasebiyle mezbûr Manol’ün babası Karali’ye yirmi bin akçeye bey‘ eyledikde Karali mürd olup menzil, oğlu Manol’e intikāl eyledikde bey‘-i mezbûr semeni fâhişdir deyû münâza‘ât-ı kesîreden sonra müslimûn-ı muslihûn tavassut edip altı bin akçeye ıslâh eyleyip müvekkil-i mezbûre Nisâ Hâtun dahi es-sulhu hayrun fehvâsınca bedel-i sulh olan altı bin akçeyi dahi bi’t-tamâm mezbûr Manol yedinden alıp kabz edip cem‘an yirmi altı bin akçe üzerine [87a] Manol’ün zimmetini ibrâ ve iskāt eyledim. Ba‘de’l-yevm mezbûr Manol ile asâleten ve vekâleten da‘vâ sâdır olursa inde’l-hükkâm mesmû‘a ve makbûle olmaya deyû ikrâr ve i‘tirâf eyledikde mukırr-ı mezbûrun vech-i meşrûh üzre olan ikrârını mukarrun lehü’l-mesfûr Manol bi’l-muvâcehe tasdîk ve tahkīk edip ol ki vâki‘ hâldir tarafeynin rızâlarıyla tahrîr ve tenmîk olunup vaz‘ vâki‘ oldu. Tâlibi yedine vakt-i hâcetde ihticâc edine. Cerâ zâlike ve hurrire fî evâili Şa‘bâni’l-mu‘azzam li sene 999.