Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 246 Hüküm no: 379 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Öldürülen Bekir b. Mustafa’nın, kan ve diyet davaları için Mehmed b. Mustafa’nın vekil tayin edildiği Mahmiye-i Galata müzâfâtından Kasımpaşa mahallâtından Câmi‘-i Kebîr mahallesi ahâlîsinden Şeyh Mehmed b. Abdülkādir ve Mevlânâ Abdullah b. Ömer ve Osman b. Mustafa ve el-Hâc Veli b. İbrahim ve Mevlânâ Ahmed b. Ali el-İmâm nâm kimesneler meclis-i şer‘-i şerîfde bi tarîki’ş-şehâde haber verip bundan akdem merhûm-ı mebrûr ilâ rahmet-i Rabbihi’l-gafûr Sürûrî Efendi mahallesinden olup zulmen maktûl olan Bekir b. Mustafa’nın babası mezbûr Mustafa’nın ve maktûl-i mezbûrun zevcesi Rahime Hâtun, maktûl-i mezbûr Bekir’in sagīre kızı Âişe’nin vasiyy-i muhtârı olup karındaşı olan işbu hâmilü’l-kitâb Mehmed b. Mustafa’yı merhûm Bekir’in dem ve diyetine müte‘allik olan da‘vâsına ve mürâfa‘a ve muhâsamaya ve ikāme-i beyyineye ve lede’l-hükkâm hasbe mâ yakdîhi’l-hâl her husûsa bizim huzûrumuzda vekîl eyledik dediklerinde mezbûr Mehmed dahi vech-i meşrûh üzre olan vekâleti hüsn-i kabûl ile kabûl ve emr-i vekâleti ikāmeye ta‘ahhüd eyledikden sonra ol ki vâki‘ hâldir bi’t-taleb tahrîr ve tenmîk olundu. Cerâ zâlike ve hurrire fî evâili şehri Şa‘bâni’l-mu‘azzam li sene tis‘a ve tis‘îne ve tis‘a mi’e. Şuhûdü’l-hâl: Bâli b. Hasan, Yusuf b. Lütfi, Hasan b. Kasım, el-Hâc Mehmed b. Mehmed, Abbas b. İbrahim, Davud Bey b. Abdullah, Musli b. Ali el-Muhzır, Hüsrev b. Abdullah ve gayruhüm mine’l-hâzırîn.