Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 259 Hüküm no: 404 Orijinal metin no: [91b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Delilsiz bir mülk satışı iddiasının mahkemece reddolunduğu Mahmiye-i Galata’dan olup bundan akdem vefât eden merhûm Süleyman Reis b. Ahmed’in kayınanası olan Rahime bt. İbrahim tarafından husûs-ı âti’z-zikre şer‘an vekâleti sâbite olan işbu bâ‘isetü’l-kitâb Râbia bt. Mehmed meclis-i şer‘-i şerîfe hâzır olup merhûm-ı mezbûrun karındaşı olan Yunus b. Ahmed mahzarında takrîr-i kelâm ve bast-ı merâm edip mezbûr Yunus müteveffâ-yı mezbûr karındaşım Süleyman Reis hâl-i hayât ve kemâl-i sıhhatinde mezbûre Rahime’nin taht-ı yedinde olan mülk menzili Rahime’den kırk [bin] akçeye iştirâ eylediğin mezbûre da‘vâ eyledikde merhûm Süleyman Reis menzil-i merkūmu Rahime Hâtun’dan meblağ-ı merkūma iştirâ eyledi Yunus’dan beyyine taleb olundukda hâlâ iki şâhidim vardır. Biri hâzır ve biri gāib deyû cevâb verdikde mahmiye-i mezbûre mahallâtından Sinan Reis mahallesinden Ali b. Mehmed nâm kimesne ihzâr olunup suâl olundukda bi tarîki’ş-şehâde haber verip merhûm Süleyman Reis hâl-i hayâtında ve kemâl-i sıhhatinde bizi kendi evine da‘vet edip kapısı önüne vardıkda kayınanam olan mezbûre Rahime Hâtun inde’l-cîrân ma‘lûmü’l-hudûd mülk menzilini kırk bin akçeye bey‘ eyledi dedikde kable’l-edâ bir hâtun dahi kapı içinden merhûm Süleyman Reis’in kavline muvâfık takrîr-i kelâm edip taht-ı tasarrufumda olan mülk menzili mezbûr Süleyman Reis’e kırk bin akçeye bey‘ eyledim ve bu husûsa da Nefîse Hâtun’u vekîl eyledim hücceti verilsin deyip lâkin ne Rahime Hâtun’u bilirim ve ne vekâletini [92a] bilirim muvâza‘a mıdır, değil midir hakīkat-i hâle vâkıf değilim dedikde mezbûr Yunus’dan husûs-ı mezbûra âhar şâhid taleb olundukda hâlâ beyyineden âciz olduğu bâ‘isden mezbûr Yunus’un menzil-i merkūmdan kasr-ı yedine tenbîh ve te’kîd ve tenbîh olup vâki‘ hâl bi’t-taleb tahrîr olundu. Cerâ zâlike ve hurrire fî evâili şehri Şa‘bâni’l-mu‘azzam li sene tis‘a ve tis‘în ve tis‘a mi’e. Şuhûdü’l-hâl: Fahrü’l-akrân Ahmed Çavuş b. Abdülmennân ve Sefer b. Hasan Reis ve Musa b. el-Hâc Mahmud ve Mehmed b. Mustafa ve Süleyman b. Mehmed er-Reis ve gayruhüm mine’l-hâzırîn.