Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 259 Hüküm no: 403 Orijinal metin no: [91b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yuvan Elyo adlı esirin hizmeti ve yaşlılığı sebebiyle azat edildiği Sebeb-i tahrîr-i kitâb-ı şer‘î budur ki Mîrî esirlerden işbu hâmil-i hâze’l-kitâb orta boylu, gendüm-gûn, elâ gözlü, açık kaşlı, sol kulağı üstünde cüz’î eser-i cerâhati olan Yuvan Elyo nâm esir otuz yıl mikdârı Rodos kadırgalarında kürek çekip mîrîye küllî istikāmet üzre hizmet edip hâlâ pîr-i nâ-tüvân olup kānûn-ı kadîm üzre geri mîrî esirlere vardiyan ta‘yîn olunmak lâzım ve mühim oldukda sadâkat ve istikāmet üzre hizmet etmek için sene erba‘a ve tis‘îne ve tis‘a mi’e Cumâdelâhire gurresinden üç yıl hizmeti tamâm oldukdan sonra âzâd olup eline ıtknâmesi verile deyû hâlâ Tersâne-i âmire’de Ahmed Çavuş b. Mehmed, Tersâne-i âmire kethüdâsı Handan Ağa câniblerinden meclis-i şer‘a hâzır olup ber sebîl mevsûf-ı mezkûr kulun yedinde olan temessükün ibrâz eylemeğin fi’l-vâki‘ nazar olunup kethüdâ-yı merkūmun mührüyle memhûr ve târih-i kitâb ile müverrah olmağın mâ hüve’l-vâki‘ bi vukū‘ihî ketb ve terkīm olundu. Cerâ zâlike ve hurrire fî evâili [şehri] Ramazâni’l-mübârek sene tis‘a ve tis‘în ve tis‘a mi’e. Şuhûdü’l-hâl: İbrahim b. Mustafa, Mehmed b. Ahmed, Mehmed b. Ramazan, Hüseyin b. Abdullah, Mîr Hüseyin [b.] İsmail ve gayruhüm mine’l-hâzırîn.