Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 262 Hüküm no: 408 Orijinal metin no: [92b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârislerin, Mehmed Bey’in terekesindeki hisseleri için İbrahim Çavuş’u vekil tayin ettiği Oldur ki Bundan akdem mir-livâ-i Biga olup vefât eden merhûm ve mağfûrun-leh Mehmed Bey’in Canfedâ nâm ümm-i veledinden zuhûr eden sulbiyesi Belkıs nâm sagīresinin kıbel-i şer‘den vasîsi olan ammesi Safiye nâm hâtunu sagīre-i mezbûre tarafından vesâyete müşârün-ileyhâ Safiye Hâtun merhûm-ı merkūmun li eb ve üm kız karındaşı olduğu cihetden asâleten merhûm-ı mûmâ-ileyhin menkûhalarından Hatice ve Fâtıma nâm hâtunlar meclis-i şer‘a hâzırûn olup merhûm-ı müşârün-ileyhe müte‘allik olan Dergâh-ı âlî çavuşlarından İbrahim Çavuş’u ihzâr ve muvâcehesinde takrîr-i kelimât edip işbu müşârün-ileyh İbrahim Çavuş bizim her birimize merhûm-ı merkūmun muhallefâtından intikāl eden hisse-i şer‘iyyemize müte‘allik olan husûslar[a] asâleten ve vesâyeten vekîl-i mutlakımız olsun dediklerinde müşârün-ileyh İbrahim Çavuş mûmâ-ileyhimâ hâtunların vech-i meşrûh üzre vâki‘ olan kelimâtını ve vekâleti vicâhen ve şifâhen kabûl ve tasdîk edip mâ vaka‘a alâ vukū‘ihî ber sebîl-i temessük ketb olunup yed-i tâlibe vaz‘ olundu. Tahrîren fî evâili şehri Rebî‘ilâhir sene 999. Şuhûdü’l-hâl: El-Hâc Mehmed b. el-Hâc Ali, Bekir Hoca b. ( ), Abdi Bey el-Cündî, Mahmud Ağa b. Abdullah, Pîrî Kethüdâ b. Abdullah, Behram Bey b. Abdullah ve gayruhüm mine’l-hâzırîn. Mâ fîhi kemâ fî aslihi’l-mahfûz nemekahü’l-hakīr Hızır b. Pîrî el-Kadı-i bi Biga. Ufiye anhümâ Mâ fîhi mine’l-vesâyet ve’l-vekâlet kad vaka‘a indî. Nemekahü’l-hakīr Abdülkerim el-Kassâmü’l-askerî bi livâ-i Biga.