Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 267 Hüküm no: 416 Orijinal metin no: [94b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Melekpir Ahmed’in, ölen Mehmed Bey’deki alacağını tahsile el-Hâc Nasuh b. Memi’yi vekil tayin ettiği Oldur ki Bundan akdem mir-livâ-i Biga olup fevt olan merhûm Mehmed Bey’in li eb ve üm kız karındaşı olup ve merhûmun sulbiyesi Belkıs nâm sagīresinin kıbel-i şer‘den vasiyyesi olan Safiye bt. Abdi Bey tarafından ve merhûm-ı mûmâ-ileyhin menkûhalarından Hatice ve Fâtıma nâm hâtunlar tarafından nehc-i şer‘î üzre vekâleti sâbit olan İbrahim Çavuş b. Mustafa nâm kimesne işbu hâmilü’l-kitâb el-Hâc Nasuh b. Memi meclis-i şer‘-i şerîfe ihzâr ve mahzarında takrîr-i kelâm kılıp bundan evvel vech-i âtî üzre vekîl olduğum Yusuf b. Melekpir Ahmed’in merhûm-ı mezkûr Mehmed Bey zimmetinde olan on bir bin sekiz yüz akçesin kabz ve îsâle ve sulha ve sâir husûsuna beni vekîl etmişdir. Ve şâhidlerim dahi vardır dedikde Nasuh-ı mezbûrun sıdk-ı makāline muvâfık udûl-i müslimînden el-Hâc Yusuf b. Abdullah ve el-Hâc Mehmed b. Mehmed nâm kimesneler bi’l-muvâcehe edâ-i şehâdet-i şer‘iyye edip fi’l-vâki‘ Yusuf-ı mezbûr mezkûr el-Hâc Nasuh’u vech-i meşrûh üzre merhûm-ı mezkûrda vâki‘ olan on bir bin sekiz yüz akçesinin kabz ve îsâline ve sâir kimesnede olan husûsunun da‘vâ ve talebe ve min külli’l-vücûh da‘vâ ve husûmetine vekîl-i mutlak etmişdir. Bu husûsa şâhidleriz ve şehâdet dahi ederiz dediklerinde ba‘de’t-ta‘dîl ve’t-tezkiyye [şehâdetleri] hayyiz-i kabûlde vâki‘ olup bu vesîka bi’t-taleb ketb olunup yed-i tâlibine vaz‘ olundu. Tahrîren fî evâili Şevvâli’l-mu‘azzam li sene 999. Şuhûdü’l-hâl: Ali b. Kasım, İlyas b. Memi, Hüsrev b. Abdullah, İbrahim b. Hamza, Mustafa b. Abdullah, Haydar b. Abdullah ve gayruhüm.