Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 268 Hüküm no: 418 Orijinal metin no: [95a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Mehmed’in Hasan b. Ahmed’in kardeşinin oğlu ve vârisi olduğu Vilâyet-i Anadolu’da vâki‘ Bozöyük kazâsı kadısı Mevlânâ Ali b. el-Hâc Ömer’in meclisinden vârid ve zeyilde mezkûr senenin evâhiri şehri Şa‘bâni’l-mu‘azzam târihiyle müverrah olan nakl-i şer‘î hücceti vârid olduğunda mazmûnunda görüldü ki, kazâ-i Bozöyük tevâbi‘inden karye-i …? sükkânından Mehmed b. Hâce Hasan ve Ali b. Eşref karye-i mezkûreden hâmil-i hâze’l-kitâb Ahmed b. Mehmed’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müdde‘î-i mesfûr, mahmiye-i Galata tevâbi‘inden Beşiktaş kasabasında bundan akdem fevt olan ve muhallefâtı emîn-i Beytülmâl-i hâs tarafından zabt edilen Reis-i sultânî Hasan b. Ahmed nâm kimesnenin karındaşının oğlu ve usûbe-i nesebiyye cihetiyle vârisidir. Şu cihetle ki, müteveffâ-yı merkūm ve müdde‘î-i mezkûrun babası Mehmed ana baba bir karındaşıdır; babaları merkūm Ahmed’dir. Verâseti ona münhasırdır. Ondan başka vâris ve terekesine müstehık kimesne ma‘lûmumuz değildir. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mû‘teber oldu. Müteveffâ-yı mezbûrun muhallefâtını zabt eden mahmiye-i mezkûrede vâki‘ Beytülmâl-i hâssın emîni fahrü’l-akrân Musa Çavuş b. Kaya ve kâtibi Hasan Bey b. Abdullah meclis-i şer‘a ihzâr edilip hüccet-i şer‘iyye yüzlerine okundu. Bunların hüccet-i şer‘iyyeyi inkârlarından sonra isimleri zeyl-i kitâbda muharrer olan Mehmed b. Mustafa ve Mehmed b. Hızır li ecli’ş-şehâde meclis-i şer‘a hâzırân olup hüccet-i mezkûre kadı-i mezbûrdan vâriddir; bizim yanımızda okunmuşdur ve meclisinde hatmiyle mühürlenmiş ve bize teslîm olunmuşdur; biz buna şâhidleriz şehâdet dahi ederiz deyû şehâdet ettiler. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mû‘teber olmağın hâkim-i âdil, şehâdetleri mûcebince müdde‘î-i mezkûrun müteveffâ-yı mezbûra verâsetine hükm etti. Cerâ zâlike ve hurrire fî evâili şehri Şevvâli’l-mükerrem sene tis‘a ve tis‘în ve tis‘a mi’e. Şuhûdü’l-hâl: İlyas b. Memi, Ali b. Kasım, İbrahim b. İlyas, Hüsrev b. Abdullah ve gayruhüm.