Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 269 Hüküm no: 420 Orijinal metin no: [95b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nazperver bt. Abdullah’ın, ölen kocası Mehmed Reis b. Yusuf’un zimmetinde kalan mehrini terekesinden tahsil ettiği Mahmiye-i Galata mahallâtından Kasımpaşa[’da] Câmi‘-[i Kebîr] mahallesi sâkinlerinden olup fevt olan merhûm Mehmed Reis b. Yusuf nâm kimesnenin zevcesi olan Nâzperver bt. Abdullah meclis-i şer‘de müteveffâ-yı mezkûrun oğlu Mustafa tarafından nehc-i şer‘î üzre vekâleti sâbit olan işbu hâmilü’l-hurûf Mustafa b. Mehmed mahzarında ikrâr ve i‘tirâf edip müteveffâ-yı mezbûr zevcimden bana ve merhûmun zevce-i âhiri olan Hatice’ye mehr-i müeccelimiz ihrâcından bâkī kalan nukūdu ve gayrıdan cem‘an yüz on beş bin akçeden sümün hisse hakkımız on dört bin üç yüz yetmiş beş akçe âid olup ale’l-infirâd yedişer bin yüz seksen yedişer buçuk akçe değmeyin meblağ-ı merkūm yedi bin yüz seksen yedi buçuk akçeyi mezkûr Mustafa[’dan] bedeli bi’t-tamâm ve’l-kemâl alıp kabz ettim. Bir akçe ve bir habbe hakkım kalmadı dedikde mukırra-i mezbûreyi mukarrun-lehü’l-mesfûr vicâhen ve şifâhen tahkīk ve tasdîk eyledikde mâ vaka‘a bi’t-taleb tahrîr olundu. Tahrîren fî evâili şehri Şevvâli’l-mükerrem sene 999. Şuhûdü’l-hâl: El-Hâc Hasan b. Abdullah, el-Hâc Piyâle b. Abdullah, Abdülkādir b. Hamza ve Derviş b. Abdullah el-Müezzin ve Abdülkerim b. Mehmed el-İmâm ve gayruhüm.