Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 270 Hüküm no: 421 Orijinal metin no: [95b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Muhammed Han’ın, Sefer Çavuş b. Abdullah’ın kölesi olmadığı ve aslen hür olduğu Oldur ki Tophâne kurbunda Süheyl Ağa mahallesi sâkinlerinden olup fevt olan merhûm ve mağfûrun-leh şehzâde çavuşlarından Sefer Çavuş b. Abdullah nâm kimesnenin yetîme-i sagīresi Râbia’ya kıbel-i şer‘den vasî nasb olunan Hüsnü Çavuş b. Abdullah nâm kimesneyi merhûmun hizmetinde olan işbu bâ‘isü’l-kitâb orta boylu, kara gözlü, kara kaşlı, gendüm-gûn evlâd-ı Acem’den, nefsi Gence sâkinlerinden Hasan b. Muhammed Han nâm kimesne meclis-i şer‘-i şerîfe ihzâr ve mahzarında takrîr-i kelâm edip ben nefsi Gence sâkinlerinden Muhammed Han oğlu olup ve anamın adı Beyhan ve kendi adım Hasan’dır kat‘â eben an ced bize rıkkıyyet târî olmamışdır. Bundan akdem hizmetinde olduğum merhûm Sefer Çavuş dahi benim sâir ahrâr-ı müslimîn gibi hürrü’l-asl olduğuma vâkıf olup müslümanlar mahzarında i‘tirâf ve ikrâr etmişdir bu husûsa şâhidlerim dahi vardır dedikde gıbbe’s-suâl ve akībe’l-inkâr mezbûr Hasan’ın vech-i meşrûh üzre sıdk-ı makāline beyyine taleb olundukda udûl-i müslimînden İlyas b. Abdullah ve Gazanfer b. Abdullah bi’l-muvâcehe edâ-i şehâdet-i şer‘iyye edip fi’l-vâki‘ merhûm-ı mezkûr Sefer Çavuş bizim yanımızda, hâl-i hayâtında ve kemâl-i sıhhatinde işbu Hasan merkūmun evlâd-ı Acem’den hürrü’l-asl, müslimü’l-mille sâir ahrâr-ı müslimîn gibi olup eben an ced rıkkıyyet ârız olmayıp babası Muhammed Han ve anası Beyhan müslümanlar olduğuna ikrâr ve i‘tirâf etti. Bu husûsa şâhidleriz, şehâdet dahi ederiz dediklerinde ba‘de’t-tezkiyye ve’t-ta‘dîl şehâdetleri hayyiz-i kabûlde vâki‘ olup Hasan merkūmun vech-i meşrûh üzre hürriyetine hükm olunup bu vesîka-i enîka alâ [mâ] hüve’l-hakīka ketb ve terkīm olundu lede’l-hâce mübeyyin-i hâl ola. Sene tis‘a ve tis‘în ve tis‘a mi’e. Şuhûdü’l-hâl: İlyas b. Hüseyin, Hüsrev b. Abdullah, Kaytas b. Abdullah, İbrahim b. İsmail ve gayruhüm.