Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 272 Hüküm no: 426 Orijinal metin no: [96b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîrî Kethüdâ’nın, ölen Mehmed Bey b. Abdi’den karz-ı hasen tarikiyle alacaklı olduğu Sebeb-i tahrîr-i kitâb oldur ki Dergâh-ı âlî müteferrikalarından fahrü’l-akrân Ali Ağa b. Abdullah meclis-i şer‘de hâzır olup merhûm mir-livâ-i Biga olup fevt olan Mehmed Bey b. Abdi Bey’in sulbiyesi Belkıs nâm sagīresinin kıbel-i şer‘den vasîsi olan Mehmed Bey b. Cafer ve merhûm mûmâ-ileyhin hemşîresi Safiye bt. Abdi Bey tarafından ve menkûhaları Hatice ve Fâtıma taraflarından vekâleti sâbit olan İbrahim Çavuş b. Mustafa mahzarında bundan akdem merhûm-ı mezbûr Mehmed Bey zimmetinde mîr-i mîrân-ı Rumeli kethüdâsı fahrü’l-akrân Pîrî Kethüdâ’nın karz-ı hasen vechile olan elli bin akçesinin da‘vâ ve kabz ve îsâline Dîvân-ı hümâyûn kâtiblerinden Cafer b. Mehmed ve Yakub b. Abdullah şehâdetleriyle mezkûr Ali Ağa’nın vekâleti sâbit oldukdan sonra mahfil-i kazâda merkūmân Mehmed Bey ve İbrahim Çavuş mahzarlarında vekîl-i mezbûr Ali Ağa takrîr-i kelâm ve tafsîl-i merâm kılıp vekîli olduğumuz Pîrî Kethüdâ’nın karz-ı hasen vechile mezkûr Mehmed Bey’e verdiği elli bin akçesi hâlâ merhûm zimmetinde lâzımü’l-edâ, vâcibü’l-kazâ deyni bâkī kalmışdır. Şâhidlerim vardır. Ber mûceb-i şer‘ görülmesini taleb ederim dedikde gıbbe’s-suâl ve akībe’l-inkâr mezkûr Ali Ağa’nın vech-i meşrûh üzre sıdk-ı makāline muvâfık beyyine taleb olundukda udûl-i müslimînden, zümre-i sipâhiyândan Behram Bey b. Abdullah ve Hasan Çelebi b. Abdullah bi’l-muvâcehe edâ-i şehâdet-i şer‘iyye edip fi’l-vâki‘ merhûm Mehmed Bey bundan evvel Pîrî Kethüdâ’dan karz-ı hasen elli bin nakd-i râyic fi’l-vakt akçeyi bizim mahzarımızda hâl-i hayâtında kabz ve ahz edip aldı. Hâlâ vâcibü’l-edâ deyn olduğuna şâhidleriz ve şehâdet dahi ederiz dediklerinde ba‘de’t-tezkiyye ve’t-ta‘dîl şehâdetleri hayyiz-i kabûlde vâki‘ oldukda ve kethüdâ-yı merkūm-ı merhûmdan zikr olunan elli bin akçeyi bi’z-zât ve bi’l-vâsıta bir akçe ve bir habbe almadığına yemîn verilmesini taleb ettiklerinde mezkûr Pîrî Kethüdâ’ya vasiyy-i merkūm ve vekîl-i mesfûr mahzarlarında yemîn billâh verilip merhûmun muhallefâtından zikr olunan elli bin akçenin edâsına hükm olundukdan sonra kayd olundu. Tahrîren fî evâsıtı şehri Şevvâli’l-mu‘azzam sene tis‘a ve tis‘în ve tis‘a mi’e. Şuhûdü’l-hâl: Fahrü’l-akrân Edhem Çavuş b. Aziz, Zübdetü’l-akrân Cafer Çavuş-ı dergâh-ı âlî b. Mehmed Bey, Ahmed Çelebi b. Mehmed Bey, Mustafa Çelebi b. Sinan, İbrahim b. İsmail ve gayruhüm.