Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 273 Hüküm no: 427 Orijinal metin no: [97a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marin’in, ölen Mehmed Bey b. Abdi’den karz-ı hasen tarikiyle alacaklı olduğu Sebeb-i tahrîr-i kitâb oldur ki Hâlâ Galata sâkinlerinden Marin bt. ( ) nâm zimmî meclis-i şer‘-i şerîfe bundan akdem mir-livâ-i Biga olup fevt olan merhûm Mehmed Bey b. Abdi’nin sulbiyesi Belkıs nâm sagīresinin kıbel-i şer‘den vasîsi olan Mehmed Bey b. Cafer Bey ve merhûm mûmâ-ileyhin hemşîresi Safiye bt. Abdi tarafından ve menkûhalarından Fâtıma ve Hatice taraflarından nehc-i şer‘î üzre vekâleti sâbit olan İbrahim Çavuş b. Mustafa nâm kimesneleri ihzâr ve mahzarlarında takrîr-i kelâm ve tafsîl-i merâm edip bundan evvel merhûm-ı mezkûr Mehmed Bey’e karz-ı hasen sekiz bin beş yüz akçe verip, beş bin akçesin alıp hâlâ üç bin beş yüz akçe merhûm zimmetinde vâcibü’l-edâ bâkī kalmışdır. Şâhidlerim dahi vardır, hâlâ taleb ederim dedikde gıbbe’s-suâl ve akībe’l-inkâr zimmî-i merkūmdan vech-i meşrûh üzre sıdk-ı makāline muvâfık beyyine taleb olundukda udûl-i müslimînden Hüseyin b. Abdullah ve Receb b. Abdullah li ecli’ş-şehâde hâzırân olup bi’l-muvâcehe edâ-i şehâdet-i şer‘iyye kılıp fi’l-vâki‘ işbu zimmî, merkūm-ı merhûm Mehmed Bey bundan evvel hâl-i hayâtında karz-ı hasen sekiz bin beş yüz akçe verip beş bin akçesin alıp hâlâ üç bin akçesi vâcibü’l-edâ merhûm zimmetinde bâkī kalmışdır. Bu husûsa şâhidleriz ve şehâdet dahi ederiz dediklerinde ba‘de’t-tezkiyye ve’t-ta‘dîl şehâdetleri hayyiz-i kabûlde vâki‘ oldukdan sonra mezkûr zimmîye ma‘dûd-ı mezbûr üç bin beş yüz akçeyi dahi dâyin-i merhûmdan bi’z-zât veya bi’l-vâsıta almayıp vâsıl olmadığına dahi ve vekîl-i merkūmân talebleriyle yemîn teklîf olunup yemîn billâh ettikde zikr olunan üç bin beş yüz akçenin merhûm-ı mesfûr muhallefâtından edâsına hükm olunup kayd olundu. Tahrîren fî evâsıtı şehri Şevvâli’l-mu‘azzam sene tis‘a ve tis‘în ve tis‘a mi’e. Şuhûdü’l-hâl: İskender Çelebi b. Ali, Mahmud b. Behram, Süleyman Bey b. Abdullah, Mustafa Bey b. Sinan ve gayruhüm.