Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 274 Hüküm no: 430 Orijinal metin no: [97b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice’nin, ölen Mehmed Bey b. Abdi Bey’den mehirden alacaklı olduğu Dergâh-ı âlî kâtiblerinden fahrü’l-akrân İskender Çelebi b. Ali meclis-i şer‘-i şerîf-i Nebevî ve dîvân-ı münîf-i Ahmedî’ye hâzır olup merhûm mir-livâ-i Biga olup fevt olan Mehmed Bey b. Abdi Bey’in sulbiyesi Belkıs nâm sagīresinin kıbel-i şer‘den vasîsi olan Mehmed Bey b. Cafer mahzarında bundan akdem merhûm-ı mezbûr Ali Bey zimmetinde zevcesi Hatice bt. ( ) mehr-i müeccelinden otuz bin akçesinin da‘vâ ve kabz ve îsâline ve Dergâh-ı âlî çavuşlarından İbrahim Çavuş b. Mustafa ve Mahmud Efendi b. Abdi şehâdetleriyle mezkûr İskender Çelebi’nin vekâleti sâbit oldukda mahfil-i kazâda mezkûr Mehmed Bey mahzarında vekîl-i merkūm İskender Çelebi takrîr-i kelâm ve tafsîl-i merâm kılıp vekîli olduğum zevcem Hatice’nin mehr-i müeccelinden otuz bin akçe merhûm-ı mezkûr Mehmed Bey zimmetinde lâzımü’l-edâ ve vâcibü’l-kazâ hâlâ deyn olup bâkī kaldığına şâhidlerim vardır. Ber mûceb-i şer‘ görülmesini taleb ederim dedikde gıbbe’s-suâl ve akībe’l-inkâr mezkûr İskender Çelebi’nin vech-i meşrûh üzre sıdk-ı makāline udûl-i müslimînden ve zümre-i sipâhiyândan Behram Bey b. Abdullah ve mezbûr İbrahim Çavuş b. Mustafa bi’l-muvâcehe edâ-i şehâdet-i şer‘iyye edip fi’l-vâki‘ merhûm Mehmed Bey’e bundan evvel merkūme Hatice’ye otuz bin akçe mehr-i müeccel ile nikâha izin verip tezevvüc olunduğuna ve hâlâ zikr olunan otuz bin akçe mehrinden merhûm zimmetinde vâcibü’l-edâ deyni bâkī kaldığına şâhidleriz ve şehâdet dahi ederiz dediklerinde ba‘de’t-tezkiyye ve’t-ta‘dîl [98a] şehâdetleri hayyiz-i kabûlde vâki‘ oldukdan sonra Hatice-i mesfûreye otuz bin akçe mehrinden bir akçe ve bir habbe bağışlamayıp bir vechile edâ olunmadığına yemîn verilmesini taleb ettiklerinde dahi mezbûr muvâcehesinde yemîn billâh edip merhûmun muhallefâtından otuz bin akçe mehrinin edâsına hükm olunup bu vesîka ber sebîlü’t-temessük terkīm olunup kayd olundu. Tahrîren fî evâsıtı şehri Şevvâli’l-mübârek sene tis‘a ve tis‘în ve tis‘a mi’e. Şuhûdü’l-hâl: Mehmed b. Cafer, Mustafa b. Ali, el-Hâc Zeyn Çelebi b. Mehmed el-Kādî, el-Hâc Mehmed, Hüsrev b. Abdullah ve gayruhüm.