Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 276 Hüküm no: 432 Orijinal metin no: [98a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mahmud Reis’in gemisinin, Mehmed b. Abdullah’a satıldığı Mahmiye-i Galata’da ve tevâbi‘inde hâlâ beytülmâl emîni olan fahrü’l-akrân Musa Çavuş b. Abdullah ve kâtibi Ali Bey b. Abdullah meclis-i şer‘-i şerîfe hâzırân olup işbu hâmilü’l-kitâb Mehmed b. Abdullah mahzarında bi’t-tav‘ ve’r-rızâ ikrâr ve i‘tirâf edip bundan akdem mahmiye-i Galata’da fevt olup muhallefâtı mîrî için zabt ve kabz olunan merhûm Mahmud Reis’in muhallefâtından İğrib nâm sefînesinin nısf hissesin işbu Mehmed’e hâl-i hayâtında yirmi dört bin akçeye bey‘ edip, akçesin alıp bundan akdem sefîne-i merkūmeyi iştirâ ettiği Derviş Reis’e verip kendi mülkü sefîneden nısfı bâkī kalıp, nısfını Mehmed Bey’e bey‘ ettiğine Abdi b. Süleyman ve Mahmud b. Abdullah şehâdet-i şer‘iyye ettiklerinden sonra sefîne-i merkūmenin nısf hissesini müteveffâ-yı mezbûr Mahmud Reis’indir. Beyne’t-tâlibîn ve’r-râgıbîn bey‘-i men yezîd oldukda yirmi bin akçeden ziyâde etmeyip merkūm Mehmed Reis üzerinde karâr edicek ehl-i vukūf kimesneler hadd-i karârıdır deyû haber dahi verdiklerinden sonra mezbûr Mehmed Reis’e yirmi bin akçeye bey‘ olunup lâkin bundan akdem mezbûr sefîneye iki bin akçe[ye] şerîk olan merkūm Mahmud Reis ma‘rifetiyle harc eylediğine şâhidân-ı mezbûrân ve abdîler? şehâdet ettikleri bâ‘isden bin akçesi hıfz olunup on dokuz bin akçesi kalıp meblağ-ı mezbûru emîn-i mezkûr Mehmed Reis yedinden bi’t-tamâm ve’l-kemâl alıp kabz ve ahz edip meclis-i şer‘de emîn-i mezbûr kabz-ı semen ve teslîm-i mebî‘ eylediğini vech-i meşrûh üzre ikrâr eyledikde sıhhat-i bey‘ u şirâya hükm olunup bu hurûf ber sebîl-i temessük ketb ve tahrîr olunup yed-i tâlibe vaz‘ ve def‘ olundu. Vakt-i hâcetde ibrâz edip temessük edine. Ceret zâlike ve hurrire fî evâsıtı şehri Şevvâli’l-mübârek sene 999. Şuhûdü’l-hâl: Mehmed b. Abdullah ve Süleyman b. Memi ve Yahya Bey b. Süleyman ve Mustafa b. Abdullah ve Sefer Çavuş b. Abdullah.