Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 276 Hüküm no: 433 Orijinal metin no: [98b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye Hâtun bt. Ali Bey’in evini, Emine Hâtun bt. Yusuf’a sattığı Oldur ki Galata’da Yolcuzâde mahallesi sâkinlerinden olan Râziye Hâtun bt. Ali Bey tarafından Mustafa b. Abdullah ve Mustafa b. Murad şehâdetleriyle husûs-ı [âti’z-] zikre vekâleti sâbite olan zevci Sinan Reis b. Abdullah meclis-i şer‘de Emine Hâtun bt. Yusuf tarafından Mustafa [b.] Abdullah er-Reis ve Muslihiddin b. Abdullah şehâdetleriyle husûs-ı âti’z-zikre vekâleti sâbit olan zevci Ramazan Reis b. Mehmed nâm kimesnenin mahzarında ikrâr ve i‘tirâf edip mezkûre zevcemin mahalle-i merkūmede vâki‘ iki bâb fevkānî [oda] ve iki mahzeni ve kenîfi müştemil olup iki tarafı Mehmedî mülkü ve bir tarafı tarîk-i hâs ve hisar duvarına mahdûd olan dârını bundan akdem mezbûr Ramazan Reis’in zevcesi mezbûre Emine’ye yirmi bin nakd-i râyic fi’l-vakt akçeye bey‘-i bât ile bey‘ edip müvekkilem kendi yediyle kabz-ı semen ve teslîm-i mebî‘ eyledi dedikde mukırr-ı mezkûrun vech-i meşrûh üzre olan kelâmını mukarrun lehü’l-mezkûr Ramazan vekâleti hasebiyle bi’l-muvâcehe tasdîk eyledikden sonra sıhhat-i bey‘a hükm olunup işbu vesîka li ecli’t-temessük bi’t-taleb ketb olunup yed-i tâlibe vaz‘ olundu. ( ) Şevvâl sene 999. Şuhûdü’l-hâl: Selâmetzâde Abdülkādir, Mehmed b. Cafer, Ahmed b. Hasan, Hüseyin b. Abdullah, Hasan b. Mehmed, Hasan b. Abdullah, Ahmed b. …, Hasan b. Abdullah, Hürrem b. Abdullah, Sinan b. Abdullah, el-Hâc Resul b. …?.