Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 277 Hüküm no: 434 Orijinal metin no: [98b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kapudan Hasan Paşa’nın el koyduğu, Mahmud Bey b. Perviz’e ait esir ve eşyaların iadesi için Hürrem Kethüdâ b. Abdullah’ın vekil tayin edildiği Oldur ki Beşiktaş sâkinlerinden olan Hürrem Kethüdâ b. Abdullah meclis-i şer‘-i şerîfe hâzır olup takrîr-i kelâm kılıp merhûm kapudân Hasan Paşa hâl-i hayâtında merhûm Mahmud Bey b. Perviz Bey’in mâl-ı metrûkâtından on bir re’s esirin ve bir samur kürkün ve bir aşçı câriyesin fuzûlî alıp kabz edip hâlâ fevt olup uhdesinde kalmağın merhûm Mahmud Bey’in eytâm-ı sıgārına kıbel-i şer‘den vasiyy-i muhtârı olup mir-livâ-i Midilli olan Mustafa Bey b. Perviz’in zikr olunan nesneleri da‘vâ ve taleb ve kabz ve îsâline beni vekîl eyledi deyicek sıdk-ı makāline mutâbık hasm-ı şer‘î yüzüne beyyine taleb olunmağın udûlden Ahmed b. Abdullah el-Cündî ve Mustafa b. Abdullah el-Cündî li ecli’ş-şehâde hâzırân olup edâ-i şehâdet-i şer‘iyye edip fi’l-vâki‘ mezkûr Mustafa bizim yanımızda merhûm-ı mezkûrun muhallefâtından merhûm-ı mezbûrun kabz eylediği mezkûr on bir re’s esirlerin ve bir samur kürkün ve câriyesini da‘vâ ve taleb ve kabz ve îsâle mezkûr Hürrem Kethüdâ’yı vekîl eyledi. Vech-i meşrûh üzre şâhidleriz ve şehâdet dahi ederiz dediklerinde ba‘de’t-ta‘dîl ve’t-tezkiyye hayyiz-i kabûlde vâki‘ olup bi’t-taleb tahrîr olundu. Tahrîren fî evâili şehri Zilka‘deti’l-ûlâ sene 999. Şuhûdü’l-hâl: Bâli Bey b. Hüseyin el-Cündî, Hüseyin b. Abdullah el-Cündî, Haydar b. Abdullah el-Cündî, Hüsrev b. Abdullah el-Muhzır, Mustafa b. Ali el-Muhzır ve gayruhüm mine’l-[hâzırîn].