Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 284 Hüküm no: 445 Orijinal metin no: [101b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüsam Reis b. Abdullah’ın, berber dükkanını oğlu Osman’a hibe ettiği Mahmiye-i Galata’ya tâbi‘ Sarı Lütfi mahallesi sâkinlerinden Hüsam Reis b. Abdullah meclis-i şer‘-i şerîfe hâzır olup oğlu Osman mahzarında ikrâr ve takrîr edip târih-i kitâbdan mukaddem işbu oğlum Osman sünnet olduğu zamânda kazâ-i merkūmede deryâ kenârında vâki‘ inde’l-ahâlî ma‘lûmetü’l-hudûd, müstağnî ani’t-tahdîd bir bâb berber dükkânımın hakk-ı tasarrufunu izn-i mütevellî ile mezkûr oğlum Osman’a şerî‘at-i hibe[ye] ri‘âyet olunup hibe ve temlîk etmiş idim. Lâkin velâyeten ve emâneten kendim zabt eder idim. Zikr olunan dükkân oğlum Osman’ındır. Min ba‘d kimesne dahl ve ta‘arruz etmeyeler dedikde mukırr-ı mezkûrun vech-i meşrûh üzre ikrâr ve takrîrin mukarrun lehü’l-mesfûr Osman bi’l-muvâcehe kabûl ve tasdîk ettikde kayd olundu. Tahrîren fî evâsıtı şehri Zilka‘deti’l-ûlâ li sene tis‘a tis‘în ve tis‘a mi’e. Şuhûdü’l-hâl: Pîr Mehmed b. Mehmed el-İmâm, Hüseyin b. Ali, Hacı Reis b. Ali, Hüseyin b. Ali, Mahmud b. Ali, İsmail b. Abdullah, Ahmed Bey b. Abdullah, Hacı Ferah b. Abdullah, Keyvan b. Abdullah, Ali b. Mustafa, Nasuh b. Abdullah, Muslihiddin b. Abdullah, Bâli b. Hüseyin, Hamza b. Abdullah ve gayruhüm.