Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 283 Hüküm no: 444 Orijinal metin no: [101b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdi Bey’in yetimi Belkıs’a vasîsi olan Mehmed Bey b. Cafer’in muhasebe kayıtlarının incelendiği Oldur ki Biga sancağı beyi olup fevt olan merhûm Mehmed Bey b. Abdi Bey’in sagīre kızı Belkıs’a kıbel-i şer‘-i şerîfden vasî nasb olunan Mehmed Bey b. Cafer ve müteveffâ-yı mezkûrun zevcesi Hatice bt. Abdullah tarafından nehc-i şer‘î üzre vekâleti sâbit olan İskender Çelebi b. Ali ve müteveffâ-yı mezkûrun hemşîresi Safiye bt. Abdi Bey ve diğer zevcesi Fâtıma tarafından nehc-i şer‘î üzre vekâleti sâbit olan İbrahim Çavuş b. Mustafa müteveffâ-yı mezbûrun vekîli ve kethüdâsı Mustafa mahzarında takrîr-i kelâm edip merhûm-ı mezbûrun dokuz yüz doksan sekiz Şa‘bânı gurresinden dokuz yüz doksan [dokuz] Muharremi’nin gāyetine gelince zabt eylediğim bâd-ı hevâ ve sâir deyni ber mûceb-i defter muhâsebesin görülmesini taleb ederiz dediklerinde cümlenin ittifâkıyla ber mûceb-i defter muhâsebesi görüldükde iki yüz dokuz bin yedi yüz otuz akçe makbûzu olup iki yüz on beş bin beş yüz sekiz akçe mesârifi bulunmağın ve zâhir hâli mükezzib olmamağın vech-i meşrûh üzre olduğuna kethüdâsı Mustafa’ya yemîn verilmesini taleb eylediklerinde yemîn verilip şol ki vâki‘ hâldir kayd olundu. Tahrîren fî evâsıtı şehri Şevvâli’l-mükerrem li sene tis‘a ve tis‘în ve tis‘a mi’e. Şuhûdü’l-hâl: Hacı Ali b. Abdullah el-Cündî, el-Hâc Nasuh b. Mehmed min Urla, Behram Bey b. Abdi, Mehmed Kethüdâ b. Cafer.