Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 283 Hüküm no: 443 Orijinal metin no: [101a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mustafa’ya babasından kalan evin beytülmalce kabz olunup satıldığı, muhallefâtın asıl vârise iade edilmesi Kasımpaşa mahallâtından Yeldeğirmeni mahallesi sâkinlerinden olup hâlâ diyâr-ı Mısır’da gönüllü bölüğünden olan Mehmed [b.] Mustafa meclis-i şer‘-i şerîfde Dergâh-ı âlî yeniçerilerinden Ahmed b. Abdullah nâm kimesne mahzarında takrîr-i kelâm edip babam Mustafa b. Seydi fevt olup mahalle-i merkūmede vâki‘ bir tarafı Ali Halîfe mülküne ve bir tarafı Fâtıma Hâtun mülküne ve iki tarafı tarîk-i âma müntehî olup iki ulvî ve iki süflî evleri ve müstakil bahçe ve muhavvata ve duvarına muttasıl iki bâb şamdancı dükkânı ve iştirâken mutasarrıf olduğu pınar ve kenîfi müştemil olan mülkler babam fevt olup bana intikāl eylemiş iken hâlâ müşârün-ileyh Ahmed fuzûlî tasarruf eder taleb ederim dedikde gıbbe’s-suâl mezkûr Ahmed cevâb verip merkūm Mustafa fevt oldukda bunda bi’l-fi‘l vârisi olmamağın muhallefâtı mahmiye-i Galata’da hâssa beytülmâl emîni olan Musa Çavuş nâm kimesne mîrî için zabt edip sûk-ı sultânîde bey‘-i men yezîd oldukda yirmi dört bin akçeye benim üzerimde karâr etmeğin emîn-i mesfûr bana bey‘ edip kabz-ı semen ve teslîm-i müsemmen eylemişdir ve elimde hüccetim dahi vardır dedikde fi’l-vâki‘ Mustafa b. Hızır nâm kassâm-ı askerî imzâsıyla mümzâ ve hatmiyle mahtûm, minvâl-i meşrûh üzre hüccet ibrâz edip lâkin merkūm Mehmed müteveffâ-yı mesfûr Mustafa’nın sulb[î] oğlu idiğini bilmem deyû cevâb verdiğimde udûl-i müslimînden ve sikāt-ı muvahhidînden Reis-i sultânî zümresinden Hüdâverdi b. Abdullah ve Cafer b. Abdullah ve Mehmed b. Abdullah ve el-Hâc Mehmed b. Hasan ve Kasım b. Abdullah ve Mustafa b. Abdullah ve üstâd Pervâne b. Abdullah ve Ali Reis b. Abdullah mezbûr Ahmed muvâcehesinde edâ-i şehâdet-i şer‘iyye kılıp işbu mezkûr Mehmed müteveffâ-yı merkūm Mustafa b. Seydi’nin sulbî oğludur. Mahallemizde doğup büyümüştür. Babası merhûm-ı mezbûr Mustafa fevt oldukda muhallefâtı bi hasebi’ş-şer‘ buna intikāl edip lâkin diyâr-ı Mısır’da bulunup ona binâen muhallefâtını beytülmâl emîni kabz etmişdir. Bu husûsa şâhidleriz, şehâdet dahi ederiz dediklerinde ba‘de’t-tezkiyye ve’t-ta‘dîl şehâdetleri hayyiz-i kabûlde vâki‘ oldukdan sonra kayd olundu. Tahrîren fî evâili Zilka‘de sene 999. Şuhûdü’l-hâl: Mustafa b. Ali, el-Hâc Yusuf b. Abdullah, Ferhad b. Abdullah, Hüsrev b. Abdullah, Ali b. İsa, Mehmed b. Burak, Mustafa b. Yusuf er-Reis, Beşir Bey b. Abdullah.