Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 289 Hüküm no: 452 Orijinal metin no: [103b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ferhad’ın, ölen kocası Mehmed Reis’in zimmetindeki mehr-i müecceli tahsil ettiği Mahrûse-i Galata tevâbi‘inden Pîrî Paşa mahallesi sâkinlerinden olup mukaddemâ vefât eden Mehmed Reis nâm kimesnenin zevcesi olup mahmiye-i İstanbul mahallâtından olan Bey mahallesi sâkinelerinden Fâtıma bt. Ferhad nâm hâtun meclis-i şer‘-i şerîfe merhûm-ı mezbûr Mehmed Reis’in Osman nâm oğluna vasî olan Hüsrev b. Abdullah ve nâzırı olan Hızır Reis b. Mahmud nâm kimesneleri ihzâr ve mahzarında takrîr-i kelâm edip merhûm Mehmed Reis zevcim olup taht-ı nikâhında iken vefât edip Üveys b. Kasım ve Mustafa b. Abdullah nâm kimesneler şehâdetleriyle üzerine yirmi bin akçe mehr-i müeccelim sâbit olup ahz u kabz etmediğime half billâh eylediğimden sonra meblağ-ı mezbûrdan vasiyy-i merkūm yedinden on üç bin akçesin alıp kabz eyledim. Bâkī olan yedi bin akçeden mezbûr Osman’ın zimmetini ibrâ-i âm ile ibrâ ve iskāt eyledim vechen mine’l-vücûh da‘vâ ve nizâ‘ım yoktur. Eğer da‘vâ ve taleb edersem lede’l-hükkâmi’l-kirâm mesmû‘ ve makbûl olmaya dedikde vasiyy-i mezkûr dahi bi’l-muvâcehe müşârün-ileyhâ Fâtıma Hâtun’un vech-i meşrûh üzerine olan kelâmını tasdîk ve tahkīk eyledikde işbu vesîka alâ mâ hüve’l-hakīka ketb ve tahrîr olundu. Tahrîren fî evâsıtı şehri Zilka‘deti’l-ûlâ sene tis‘a ve tis‘în ve tis‘a mi’e. Şuhûdü’l-hâl: Yahya b. Abdullah el-müteferrika min mahalle-i Mahmudpaşa, Süleyman ez-Zevvâkü’s-sultânî min mahalle-i Nişancıpaşa ve Abdüllatif el-Kadı min kazâ-i Samsun ve Ramazan b. İskender b. Abdullah, Mehmed Reis b. Hasan ve Ali Reis b. Abdullah ve Sefer b. Mustafa, Hasan b. Abdullah ve Veys, Kasım Ahmed el-Muhzır ve gayruhüm mine’l-hâzırîn.