Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 288 Hüküm no: 451 Orijinal metin no: [103b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müntehâ bt. Mustafa’nın boşandığı kocası Ahmed b. Abdullah’taki mehr-i müeccelini tahsil ettiği Zümre-i topçuyândan Ahmed b. Abdullah nâm kimesneyi bundan akdem zevci olduğu Müntehâ bt. Mustafa nâm hâtun meclis-i şer‘-i şerîfe ihzâr ve mahzarında takrîr-i kelâm ve tafsîl-i merâm kılıp işbu Ahmed bundan evvel zevcim olup beni ıtlâk etmişdir. Hâlâ mehr-i müeccelimden zimmetinde iki bin akçem vardır taleb ederim dedikde gıbbe’s-suâl Ahmed cevâb verip fi’l-vâki‘ mezkûre Müntehâ bundan akdem zevcem idi. Lâkin ıtlâk edip mehr-i müecceli bin akçeden ziyâde değildir dedikde mezbûre Müntehâ mehri bin akçeden ziyâde idiğini isbâtdan âcize olup mehrini ve sâir kendiye âid ve râci‘ olan hakkını da Ahmed-i mesfûrun zimmetini ibrâ ve iskāt edip ma‘dûd-ı mezbûr bin akçe i‘tirâfını ahz u kabz ettikde min ba‘d müşârün-ileyh Ahmed’in zimmetinde bir akçe ve bir habbe hakkım kalmadı. Min külli’l-vücûh hukūkum aldım. Kat‘â da‘vâ ve nizâ‘ım yoktur deyû ikrâr ve i‘tirâfını mesfûr Ahmed bi’l-muvâcehe kabûl ve tasdîk ettikden sonra bu vesîka-i enîka alâ mâ hüve’l-hakīka ketb ve terkīm olunup ber sebîlü’t-temessük yed-i tâlibe vaz‘ ve def‘ olundu. Lede’l-hâce müzekkir-i mâ cerâ olup vakt-i hâcetde ihticâc edine. Cerâ zâlike ve hurrire fî evâsıtı şehri Zilka‘deti’l-ûlâ sene 999. Şuhûdü’l-hâl: Kaytas Bey b. Abdullah, Hüsrev b. Abdullah, Musli b. Ali, İbrahim b. İsmail ve gayruhüm.