Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 309 Hüküm no: 474 Orijinal metin no: [112b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Ağa’nın ödünçten Mehmed Bey’de alacağı olduğu Mahmiye-i Kostantıniyye mahallâtından Sinan Paşa mahallesinden fahrü’l-emâsil ve’l-akrân kāid-i sultânî Ahmed b. Mehmed ve fahrü’l-ekâbir Edhem Çavuş b. Gazanfer meclis-i şer‘-i şerîfe hâzırân olup, bundan akdem Biga livâsında fevt olan merhûm-ı mağfûr el-vâsıl ilâ rahmeti rabbihi’l-gafûr Mehmed Bey b. Abdi’nin Belkıs nâm sagīre kızına kıbel-i şer‘den mansûb vasî olan Mehmed Bey b. Cafer mahzarında ve âti’z-zikri münkirîn olan müteveffâ-yı mezbûrun zevceleri Hatice Hâtun bt. Abdullah ve Fâtıma bt. Abdullah kıbellerinden ve müteveffâ-yı mezbûrun kız karındaşı Safiye bt. Abdi Bey kıbelinden husûs-ı âti’z-zikri istimâ‘a vekâleti bimâ hüve nehcü’s-sübût şer‘an sâbit olan kāid-i sultânî İbrahim b. Mustafa mahzarında, fahrü’l-emâcid ve’l-ekârim zahrü’l-ekâbir ve’l-e‘âzım sâhibü’l-mefâhir ve’l-me’âsir, câmi‘ü’l-mehâmid ve’l-mekârim Hazret-i Mahmud Ağa b. Abdullah kıbelinden hasm-ı şer‘-i câhid mahzarında âti’z-zikri da‘vâya vekâleti İbrahim Çavuş b. Şuca‘ ve Osman Çavuş b. Hüseyin’in şehâdetleri ile sâbit olan bâ‘is-i hâze’l-kitâb mefharü’l-hutebâ el-Hâc İsmail b. Hasan’dan vekâleten sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müteveffâ-yı mezbûr hâl-i sıhhatinde bizim yanımızda ve katımızda, üzerinde ve zimmetinde müşârün-ileyh Mahmud Ağa’ya karz-ı şer‘î cihetinden lâzımü’l-edâ ve vâcibü’l-kazâ râyicü’l-vakt elli bin akçe deyni olduğunu ikrâr ve i‘tirâf etti. Şehâdetleri ba‘de ri‘âyeti şerâiti’l-kabûl ve ba‘de’t-ta‘dîl ve’t-tezkiyye inde’ş-şer‘ makbûl ve mû‘teber olmağın mûcebince hükm edildi. Cerâ zâlike ve hurrire fî evâili şehri Muharremi’l-harâm sene elf mine’l-hicreti’n-nebeviyye. Şuhûdü’l-hâl: Mehmed Çelebi b. Ahmed Kazasker câmi‘i hatîbi, Nebi b. Hüsam el-Müezzin, Osman b. Hüseyin Kāid-i sultânî, Ali Bey b. Hüseyin.