Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 311 Hüküm no: 478 Orijinal metin no: [113a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. Simo’nun, Ali b. Abdullah’a borcunu ödediği Mahmiye-i Galata’da Bereketoğlu mahallesinde sâbıkan müteveffâ kasab Ömer’in sagīr ve sagīresine vasiyy-i muhtâr olan Ali b. Abdullah, Karaköy kasablarından Hristo v. Simo nâm zimmîden hak taleb edip meclis-i şer‘-i şerîfe ihzâ[r] ve mahzarında takrîr-i kelâm eyledi ki mahalle-i merkūmede müteveffâ olan mezbûr Ömer’in mezkûr olan Hristo zimmetinde sekiz bin akçesi vardır taleb ederim suâl olunsun dedikde gıbbe’s-suâl merkūm Hristo cevâb verdi ki fi’l-vâki‘ mezbûr Ömer’in bende sekiz bin [akçesi] var idi lâkin hâl-i hayâtında kendiye bi’t-tamâm teslîm eyledim dedikde mezkûr Ali inkâr eyleyip sıdk-ı makāline beyyine taleb etmeğin udûl-i müslimînden Ahmed b. Abdullah ve Mustafa b. Abdullah el-Cündî ve Kasım b. Abdullah er-Râcil ve Receb b. Abdullah nâm kimesneler li ecli’ş-şehâde hâzırûn olup fi’l-vâki‘ mezbûr Hristo meblağ-ı mezkûru hâl-i hayâtında merkūm Ömer’e teslîm eyledi bu husûsa şâhidleriz ve şehâdet dahi ederiz deyû edâ-i şehâdet-i şer‘iyye ettiklerinde şehâdetleri hayyiz-i kabûlde vâki‘ olup yed-i tâlibe bu vesîka-i enîka vaz‘ olundu. Şuhûdü’l-hâl: Mehmed b. Abdullah, Yusuf Reis b. Mehmed, Ahmed b. Abdullah, Mustafa b. Ali, Mustafa b. Ali ve gayruhüm.