Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 314 Hüküm no: 483 Orijinal metin no: [114b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Samarya v. Salamon adlı Yahudi’nin Mehmed Bey’de alacağı olduğu Mahmiye-i Kostantıniyye mahallâtından Hâce Paşa mahallesi sükkânından Rüstem Paşa câmi‘i hâfızı Mehmed b. Mehmed ve Mahmud b. İlyas meclis-i şer‘a hâzırân olup, Biga livâsında bundan akdem fevt olan Mehmed Bey b. Abdi’nin Belkıs nâm sagīre kızına kıbel-i şer‘den mansûb vasî olan Mehmed b. Cafer mahzarında ve âti’z-zikri münkirîn olan müteveffâ-yı mezbûrun zevceleri Hatice Hâtun bt. Abdullah ve Fâtıma bt. Abdullah kıbellerinden ve müteveffâ-yı mezbûrun kız karındaşı Safiye bt. Abdi Bey kıbelinden husûs-ı âti’z-zikri istimâ‘a vekâleti bimâ hüve nehcü’s-sübût şer‘an sâbit olan kāid-i sultânî İbrahim Çavuş b. Mustafa mahzarında, bâ‘is-i hâze’l-kitâb hekîm-i sultânî Samarya v. Salamon el-Yahudi’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müdde‘î-i mezbûrun, müteveffâ-yı merkūmun zimmetinde müşterâ-i makbûz mal bahâsından râyicü’l-vakt dört bin iki yüz akçe hakkı vardır. Müdde‘î-i mezbûra meblağ-ı merkūmu kısmen veya tamâmen almadığına ve bi vechin mine’l-vücûh merhûmun zimmetini ibrâ etmediğine dâir Tevrat’ı inzâl eden Allahü Te‘âla adına yemîn verilmesinden sonra ve şâhidlerin şehâdetlerinin ba‘de ri‘âyeti şerâiti’l-kabûl ve ba‘de’t-ta‘dîl ve’t-tezkiyye inde’ş-şer‘ makbûl ve mû‘teber olmasından sonra hâkim-i muvakki‘ şehâdetleri mûcebince meblağ-ı mezbûrun müteveffâ-yı merkūmun muhallefâtından edâsına hükm etti. Cerâ zâlike ve hurrire fî evâsıtı şehri Muharremi’l-harâm sene elf. Şuhûdü’l-hâl: Celal Çelebi b. Seyyid Mustafa, Abdülkādir b. Hacı, Ahmed Çelebi b. Hacı, Mustafa b. Ali.