Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 322 Hüküm no: 496 Orijinal metin no: [117b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Borç nedeniyle dükkanın Ferhad b. Abdullah’a satıldığı Bundan akdem mahmiye-i Galata mahallâtından Bereketoğlu mahallesinde fevt olan Ömer nâm kimesnenin Mehmed ve Râziye nâm sagīreynine vesâyeti nehc-i şer‘î üzre sâbit olan vasiyy-i muhtâr Ali b. Abdullah ve müteveffâ-yı mezbûrun Osman nâm oğlu hâzırân olup müteveffâ-yı merkūmdan irs-i şer‘le intikāl eden, mahmiye-i Galata müzâfâtından Karaköy nâm mevzi‘de vâki‘, merhûm Çakır Ağa evkāfından olup vakf-ı mezbûra ödenen icâresi şehrî yüz yirmi akçe bulunan (…) ve iki tarafdan da tarîk-i âm ile mahdûd bulunan cemî‘ dükkânı cümle hudûdu ve kâffe-i hukūkuyla râyicü’l-vakt otuz bin akçe semen-i mu‘ayyen-i makbûzla hâmil-i hâze’l-kitâb zevvâk-ı sultânî Ferhad b. Abdullah’a bey‘-i bâtt-ı sahîh ile bey‘ ettiklerini asâleten ve vesâyeten ikrâr eylediler. O da iştirâ edip vâki‘ ikrârı vicâhen ve şifâhen tasdîk etti. İşbu mübâye‘a, müteveffâ-yı mezbûr üzerine dükkânı bey‘ etmeksizin edâsı mümkün olmayan düyûn-ı kesîre sâbit olmasından ve dükkânın mecâlis-i tâlibin ve mehâfil-i râgıbîne arz olunup semenin meblağ-ı mezkûrda tekarrür etmesinden sonra vâki‘ oldu. Cerâ zâlike ve hurrire fî evâsıtı şehri Muharremi’l-harâm sene elf. Şuhûdü’l-hâl: Mahmud b. Abdullah, Ali Bey b. Ahmed, Mustafa b. Ali, Hüsrev b. Abdullah ve gayruhüm.