Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 322 Hüküm no: 495 Orijinal metin no: [117b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miras yoluyla intikal eden bir ev üzerindeki anlaşmazlığın giderilmesi Akzâ kuzâti’l-müslimîn ve evlâ vülâti’l-muvahhidîn, ma‘denü’l-fazli ve’l-yakīn. Hüccetü’l-hakkı ale’l-halki ecma‘în. Vâris-i evliyâ-i ve’l-mürselîn el-muhtas bi mezîd-i inâyeti’l-meliki’l-mu‘în. Mevlânâ Galata kadısı -zîde fazluhû- tevkī‘-i refî‘-i hümâyûnum vâsıl olucak ma‘lûm ola ki dârende-i hümâyûn Mustafa nâm kimesne ile Zeynî ve Aynî ve Fahri nâm hâtunlar Dergâh-ı mu‘allâm’a âdem gönderip şöyle arz eylediler ki taht-ı kazânızda Yolcuoğlu mahallesinde Mehmed nâm kimesne ile dedelerinden intikāl eden ma‘lûmetü’l-hudûd (…) olan mülk evini bunlar bey‘ eylemek istedikde mücerred bey‘ ettirmeyip cümle kendi tasarruf eylemek için mezbûr Mehmed müteveffâ-yı mezbûr dedem bana şart-ı vakf eylemişdir deyû vakıf olmayıp elinde bir vechile temessükü yoğ iken ve bu bâbda bunların ellerinde fetvâları dahi var iken evler cümle hilâf-ı şer‘-i şerîf cebren alıp te‘addî eylemiş buyurdum ki hükm-i şerîfimle vardıklarında husamâyı berâber görüp bu husûsu bundan akdem bir def‘a şer‘ ile fasl olunmayıp bilâ özr-i şer‘î on beş yıl mürûr etmiş değil ise onat vechile hak üzre teftîş ve tefahhus edip göresiz fi’l-vâki‘ kaziyye arz eyledikleri gibi ise ol bâbda muktezâ-yı şer‘-i şerîf-i kavîm ile amel edip ba‘de’s-sübût şer‘ ile menzilde olan haklarını bunlara alıveresiz şer‘-i şerîfe muhâlif mezbûr Mehmed[’e] ol vechile te‘allül ve nizâ‘ ettirmiyesiz. mütemerridi seğidip? muhtâc-ı arz olanları yazıp bildiresiz tekrâr bu husûs için şikâyet olunmalı etmiyesiz şöyle bilesiz ve ba‘de’n-nazar bu hükm-i hümâyûnu ellerinde ibkā edip alâmet-i şerîfime i‘timâd kılasız. Tahrîren fî evâsıtı Rebî‘ilevvel sene 999.