Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 321 Hüküm no: 494 Orijinal metin no: [117a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Dimitri, Yareş v. Yorgi ve Dimo v. Yani’nin, ölen Ömer b. Abdullah’a borçlu oldukları Mahmiye-i Galata’da Bereketoğlu mahallesinde vefât [eden] Ömer b. Abdullah’ın sagīr ve sagīresine vasiyy-i muhtâr olan Ali b. Abdullah nâm kimesne Karaköykapısı’nda mumculardan Apostol v. Dimitri ve Yareş v. Yorgi ve Dimo v. Yani nâm zimmîleri meclis-i şer‘-i şerîfe ihzâ[r] ve mahzarında takrîr-i kelâm edip müteveffâ-yı merkūm Ömer’in mezbûr zimmîler zimmetinde altı bin akçesi vardır taleb ederim suâl olunsun dedikde gıbbe’s-suâl mezbûrûn zimmîler fi’l-vâki‘ mezbûr Ömer’in bizim zimmetimizde altı bin [akçesi] var idi lâkin hâl-i hayâtında kendiye beş bin beş yüz akçesin edâ ettik. Meblağ-ı merkūmdan ancak bizim zimmetimizde beş yüz akçe hakkı kalmışdır dedikde merkūm Ali b. Abdullah inkârla cevâb vermeğin mezkûrûn zimmîlerin da‘vâsına mutâbık beyyine taleb olundukda udûl-i müslimînden Ahmed b. Abdullah ve Mustafa b. Abdullah nâm kimesneler li ecli’ş-şehâde hâzırân olup fi’l-vâki‘ müteveffâ-yı merkūm Ömer’e hâl-i hayâtında merkūmûn zimmîler meblağ-ı mezbûrdan beş bin beş yüz akçesin edâ etmişlerdir. Bu husûsa şâhidiz, şehâdet-i şer‘iyye dahi ederiz dediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ olup mûcebiyle hükm olunup li ecli’t-temessük bu vesîka ellerine vaz‘ olundu. Şuhûdü’l-hâl: Ferhad Ağa b. Ahmed, İbrahim b. Mustafa, Mustafa b. Mehmed, Mehmed b. (…), Mustafa b. Ali.