Galata Mahkemesi 15 Numaralı Sicil (H. 981 - 1000 / M. 1573 - 1591) cilt: 34, sayfa: 320 Hüküm no: 493 Orijinal metin no: [117a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmale intikal edip satılan evlerin parasının asıl sahiplerine iadesi Kıdvetü’l-emâsil ve’l-akrân Galata hâssa beytülmâl emîni olan Musa Çavuş -zîde kadruhû- tevkī‘-i refî‘-i hümâyûn vâsıl olucak ma‘lûm ola ki sâbıkan beytülmâl-i hâssa emîni Abdullah Çavuş kapıma arz gönderip hâssa beytülmâl cânibinden zabt olunup ba‘dehû beytülmâl tarafından bey‘ olunan evler kadîmü’l-eyyâmdan bu seneye gelinceye vârisleri zuhûr ettikde bey‘ fesh olunmak emr-i şerîf ile men‘ olunmuş iken hâlâ beytülmâl-i hâssa tarafından füruht olunup hüccet verilmiş evleri taleb edip almak istedikleri ecilden beytülmâl cânibinden hâliyâ zabt olunan evler mezâd olundukda beytülmâlden bey‘ olunan evler, vârisleri zuhûr edip taleb ettiklerinde üslûb-ı sâbık üzre bahâsı verilmek üzre emr-i şerîf ricâsına bildirdiği sâbıkan sene sitte ve tis‘în ve tis‘a mi’e Cumâdelâhiri’nin yirmi sekizinde arz olundukda kānûn-ı kadîmle amel olunup beytülmâl cânibinden füruht olunan emlâk ve akārın akçesi verilmek emrim olmuşdur. Buyurdum ki hükm-i şerîfim vardıkda bu bâbda olan fermân-ı şerîfim mûcebince kānûn-ı kadîm[le] amel edip beytülmâl cânibinden kabz olunup cânib-i beytülmâlden kānûn üzre mirâren ve kirâren mezâd olundukdan sonra füruht olunan emlâk ve akārın vârisleri min ba‘d kānûn-ı kadîme muhâlif dahl ve ta‘arruz ettirmeyip onun gibi vârisleri dîvân-ı âlîde sâbit olan evlerin ve akārın bahâsın verilip min ba‘d emr-i şerîfe muhâlefet vaz‘ olunmayıp dâimâ bu vechile amel oluna ve işbu emr-i şerîfim kassâm-ı askerî sicillerine kayd-ı sicil olundukdan sonra her kim hâssa beytülmâl emîni olursa yedinde ibkā oluna şöyle biline. Tahrîren fî evâili Rebî‘ilevvel sene 999.