Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 53 Hüküm no: 14 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İki kardeşin tereke davasında sulh oldukları (…) mahallesinde sâkine Nisâ Hâtun bt. Mehmed Çelebi nâm Hâtun meclis-i [şer‘de] husûs-ı âti’z-zikri da‘vâ ve [talebe] (…) vekâleti sâbit olan Mehmed b. Şahveli nâm kimesne meclis-i şer‘-i şerîfde işbu hâfızatü’l-kitâb Âişe Hâtun bt. Mehmed Çelebi nâm (…) [husû]s-ı âti’z-zikri tasdîka vekîl olup şer‘an vekâleti sâbite olan Ahmed Çelebi b. Mehmed mahzarında ikrâr ve takrîr-i kelâm edip (…) müvekkilim mezbûre Nisâ Hâtun’un babası Mehmed Çelebi fevt olup verâseti müvekkilem mezbûre Nisâ Hâtun ile ve mezbûre Âişe’ye [münha]sıra olmağın müvekkilemin âid olan hisse-i şer‘iyyesini ve Gürciyyetü’l-asl Mülâyim bt. Abdullah nâm câriyesini da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâki‘ olmuş idi el-hâletü hâzihî husûs-ı mezbûra muslihûn tavassut edip es-sulhu seyyidü’l-ahkâm fehvâsıyla âmil olup bin nakid râyic fi’l-vakt akçeye sulh olup bedel-i sulh olan meblağ-ı mezbûru vekâletim hasebiyle bi’t-tamâm ve’l-kemâl ahz ü kabûl edip zimmetini ibrâ ve iskāt-ı hak eyledim vechen mine’l-vücûh ve sebeben mine’l-esbâb vekîl-i merkūm Ahmed Çelebi’nin müvekkilesi [Âi]şe Hâtun ile da‘vâ ve nizâ‘ım kalmadı dedikde mukırr-ı mezbûru kelimât-ı meşrûhunda mukarrun [lehü]’l-merkūm vicâhen ve şifâhen tasdîk ettikde mâ hüve’l-vâki‘ alâ vukū‘ihî bi’t-taleb kayd ü ketb olundu tahrîren fi’l-yevmi’s-sânî aşer min şehri Receb sene hamse ve elf. Şuhûdü’l-hâl: Es-Seyyid Abdurrahman b. es-Seyyid Sefer, Mustafa Çelebi b. Ahmed, Mustafa Reis b. Mürüvvet, Ömer b. Derviş, Hüseyin b. Mehmed, es-Seyyid Mehmed b. es-Seyyid Abdurrahman, es-Seyyid Cafer, Mehmed Halîfe b. el-Hâc Ali, Ahmed b. Hüseyin, Hüsrev b. Abdullah, Mehmed b. Yusuf