Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 54 Hüküm no: 16 Orijinal metin no: [2b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hatun’un ev satın aldığı Mihriban bt. Abdullah kendi nefsinden asâleten ve bundan akdem fevt olan Mustafa nâm kimesnenin Osman ve Ebûbekir nâm evlâd-ı sagīreynine kıbel-i şer‘den mansûbe vasî olarak vesâyeten ve Mehmed Reis b. Mustafa ve dâhil-i mahmiye-i Galata mahallâtından Yolcuoğlu mahallesinde sâkin olan Mustafa b. Abdullah nâm kimesneler meclis-i şer‘-i şerîfe hâzırûn olup işbu akdin kendilerinden sudûruna kadar sâhib ve mâlik bulundukları, ellerinde ve taht-ı tasarruflarında bulundurdukları, kendilerine irs-i şer‘le intikāl eden, mahalle-i mezbûrede vâki‘, fevkānî ve tahtânî iki beyti, mahzeni ve su kuyusunu müştemil bulunan, bir tarafdan Fâtıma Hâtun bt. Veli Reis ve Habibe Hâtun bt. Memi Hoca mülkleri, diğer tarafdan Sitti Hâtun bt. İskender mülkü, diğer tarafdan da Memi Hoca b. Abdülhay mülkü ile mahdûd bulunan cemî‘ menzili cümle tevâbi‘ ve levâhıkı ve kâffe-i hukūk ve merâfıkı ile râyicü’l-vakt bin akçe semen-i mu‘ayyen-i makbûz ile ve îcâb kabûl ve teslîm tesellümü hâvî bey‘-i bâtt-ı sahîh ile hâmiletü hâze’l-kitâb Âişe Hâtun bt. Râci’ye asâleten ve vesâyeten bey‘ ettiklerini ikrâr ettiler. Müşteriye-i mûmâ-ileyhâ kıbelinden tasdîke vekâleti el-Hâc Hasan b. Abdullah ve Mehmed b. Ali’nin şehâdetleri ile sâbit olan fahrü’l-a‘yân Memi Hoca b. Abdülmennân vâki‘ ikrârı vicâhen ve şifâhen tasdîk etti. Cerâ zâlike ve hurrire fi’l-yevmi’l-âşir min şehri Recebi’l-mürecceb sene hamse ve elf. Şuhûdü’l-hâl: ( )