Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 56 Hüküm no: 20 Orijinal metin no: [3a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstiğlâl yoluyla satılan ev bedelini vakfa ödemeyen miras bırakanın terekesinden borcun ödendiği Mahmiye-i Galata’da merhûm Tomtom Memi vakfı’na bi’l-fi‘l mütevellî olan Receb Çelebi b. Abdullah meclis-i şer‘-i şerîfde bundan akdem mahmiye-i mezbûre hâricinde Kalafatçıbaşı mahallesinde sâkin iken vefât eden merhûm münâdî Mehmed b. Mustafa nâm kimesnenin evlâd-ı sıgārına kıbel-i şer‘den vasiyyesi olan Mihri bt. Abdullah nâm hâtunu ihzâr ve mahzarında takrîr-i da‘vâ edip müteveffâ-yı mezbûr Mehmed işbu sene dokuz yüz seksen altı Rebî‘ulâhirinin gurresinde vakf-ı mezbûra bi tarîki’l-istiğlâl mahalle-i mezbûrede vâki‘ hudûdunun bir tarafı Hamza b. Abdullah mülküyle ve bir tarafı el-Hâc Mahmud mülküyle ve bir tarafı Servinaz Hâtun mülküyle ve bir tarafı tarîk-i âm ile mahdûd olan menzilini üç bin nakd-i râyic fi’l-vakt akçeye bey‘ etmiş idi hâlen tevliyyetim hasebiyle müteveffâ-yı mezbûrun muhallefâtından taleb ederin deyip gıbbe’l-istintâk vasiyye-i merkūme inkâr ile cevâb vericek udûl-i müslimînden Abdülkādir b. Hacı ve Mahmud b. İslâm el-Müezzin nâm kimesneler li ecli’ş-şehâde meclis-i şer‘a hâzırân olup istişhâd olundukda edâ-i şehâdet-i şer‘iyye ettiklerinde şehâdetleri hayyiz-i kabûlde vâki‘ olup şehâdet-i şer‘iyye edip fi’l-vâki‘ mezkûr Mehmed zikr olunan menzilini vakf-ı mezbûr malından târih-i mezbûrda üç bin akçeye bi tarîki’l-istiğlâl bey‘ edip vermişdi deyû şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâki‘ oldukdan sonra meblağ-ı mezbûru küllen ve ba‘zan müteveffâ-yı merkūmdan bi’z-zât ve bi’l-vâsıta ahz ü kabz etmediğine mezbûr Receb Çelebi istihlâf olundukda yemîn billâhi’l-aliyyi’l-a‘lâ etmeğin müteveffâ-yı merkūmun muhallefâtından meblağ-ı mezbûrun edâsına hükm olunup mâ hüve’l-vâki‘ alâ vukū‘ihî gıbbe’t-taleb ketb ve imlâ olunup yed-i tâlibe vaz‘ ve def‘ olundu. Tahrîren fi’l-yevmi’t-tâsi‘ ve’l-ışrîn min şehri Rebî‘ilevvel sene hamse ve elf. Şuhûdü’l-hâl: Hasan Reis b. Şâhin, Mehmed Çelebi b. Mehmed, Mustafa Bey b. Abdullah, Ahmed b. Abdullah el-Bevvâbü’s-sultânî, Ahmed Reis b. Süleyman reis-i sultânî, Ahmed b. Hasan ve gayruhüm