Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 57 Hüküm no: 21 Orijinal metin no: [3a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Memi’nin terekesinden Hacı Mustafa’nın alacağının ödendiği Mahmiye-i Galata hâricinde Müeyyedzâde mahallesinde sâkin el-Hâc Mustafa b. Hasan meclis-i şer‘-i şerîfe bundan akdem mahalle-i mezbûrede sâkin iken vefât eden merhûm el-Hâc Memi b. Abdullah’ın evlâd-ı sıgārına kıbel-i şer‘den vasiyy-i mansûbu olan el-Hâc Mehmed b. Davud nâm kimesneyi ihzâr ve mahzarında takrîr-i da‘vâ edip müteveffâ-yı mezbûr el-Hâc Memi’ye karz-ı hasen on bin akçe vermişdim hâlen hakkımdır muhallefâtından taleb ederin deyip gıbbe’l-istintâk vasiyy-i mezbûr inkâr edicek udûl-i müslimînden Memi Reis b. Abdullah ve Yusuf b. Abdullah nâm kimesneler meclis-i şer‘-i şerîfe li ecli’ş-şehâde hâzırân olup biz şâhidleriz şehâdet-i şer‘iyye dahi ederiz ki mezbûr el-Hâc Mustafa müteveffâ-yı mezbûra karz-ı hasen on bin akçe vermişdi deyû edâ-i şehâdet-i şer‘iyye eylediklerinde gıbbe’t-tekmîl-i şerâiti’l-kabûl şehâdetleri hayyiz-i kabûlde vâki‘ oldukdan sonra meblağ-ı mezbûru küllen ve ba‘zan müteveffâ-yı mezbûrdan bi’z-zât ve bi’l-vâsıta ahz ü kabz etmeyip veya hibe ve ibrâ ve âhara havâle etmediğine merkūm el-Hâc Mustafa istihlâf olundukda yemîn billâhi’l-aliyyi’l-a‘lâ etmeğin müteveffâ-yı mezbûrun muhallefâtından meblağ-ı mezbûrun edâsına hükm olunup mâ hüve’l-vâki‘ ketb olundu. Tahrîren fi’s-sâlisi aşer min şehri Rebî‘ilâhire sene hamse ve elf. Şuhûdü’l-hâl: Hüsrev b. Abdullah, Mehmed b. Ali, Hüseyin Çelebi b. el-Hâc Mustafa, Ahmed b. Hüseyin, Nebi b. Murad ve gayruhüm