Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 63 Hüküm no: 33 Orijinal metin no: [4a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Abdurrahman’ın, Hamza’daki parasının kefil Ahmed Bey’den talep edildiği Bundan akdem mahmiye-i Galata hâricinde Şahkulu mahallesinde sâkin iken vefât eden merhûm Abdurrahman b. Mehmed nâm kimesnenin sagīr oğlu Mehmed’in kıbel-i şer‘den vasiyy-i mansûbu olan Davud Halîfe b. Müheyyâ meclis-i şer‘-i şerîfe Ahmed Bey b. Mehmed nâm kimesneyi ihzâr ve mahzarında takrîr-i da‘vâ edip müteveffâ-yı mezbûr Abdurrahman, Hamza b. Abdullah nâm kimesneye karz-ı hasen üç bin akçe verip mukābelesinde bir sandık esbâb Rehin vaz‘ etmişdi hâlen merkūm Abdurrahman vefât etmekle meblağ-ı merkūm sagīr-i merkūma intikāl etmeğin ben dahi vesâyetim hasebiyle mezbûr Ahmed Bey’den taleb ederim vâki‘ hâl suâl olunup takrîri tahrîr olunmasını taleb ederim dedikde gıbbe’s-suâl merkūm Ahmed Bey cevâb verip dedi ki fi’l-hakīka müteveffâ-yı mezbûr Hamza meblağ-ı mezbûr üç bin akçeyi karz-ı hasen verip ahz ü kabz ettikde ben dahi meblağ-ı mezbûrun zararına kefâlet-i sahîha ile kefîl bi’l-mâl oldum idi el-hâletü hâzihî târih-i kitâbdan doksan güne varınca bana mehl-i şer‘î verilip mezbûr Hamza zikr olunan târihe değin gelmez ise meblağ-ı mezbûru kefâletim hasebiyle edâ edeyim dedikde mâ vaka‘a bi’t-taleb ketb olunup yed-i tâlibe vaz‘ olundu. Hurrire fi’l-yevmi’s-sâmin [min] şehri Cumâdelûlâ sene hamse ve elf. Şuhûd: Yusuf b. Abdullah, Mehmed b. Ali, Hüsrev b. Abdullah, Mustafa b. Ömer, İskender Reis b. Abdullah ve gayruhüm