Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 70 Hüküm no: 43 Orijinal metin no: [5b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın Haydar Bölükbaşı’nın vârisi olduğu Hâric-i Galata’da Yazıcı mahallesinde sâkin Mehmed b. Abdullah nâm kimesne meclis-i şer‘de mahmiye-i Galata’da beytülmâlü’l-hâs emîni olan Mehmed Çavuş b. Abdullah mahzarında takrîr-i da‘vâ edip bundan akdem mahalle-i mezbûrede vefât eden merhûm Haydar Bölükbaşı nâm kimesnenin ben li eb ve üm karındaşı oğlu olup merhûm-ı mezbûr vefât etmekle verâseti bana münhasıra olup cümle muhallefâtı bize âid olmuşken emîn-i merkūm hilâf-ı şer‘ müteveffâ-yı mezbûrun muhallefâtını ahz ü kabz etmişdir vâki‘ hâl emîn-i merkūma suâl olunup icrâ-yı hak olunmasın taleb ederim dedikde ba‘de’s-suâl emîn-i mezbûr Abdullah müteveffâ-yı mezbûrun li eb ve üm karındaşı oğlu idiğin münkir olacak merkūm Abdullah’dan sıdk-ı makāline beyyine taleb olundukda ricâl-i müslimînden Nasuh Bey b. Abdullah ve Mustafa Bey b. Abdullah ve Mahmud Bey b. Abdullah ve Mehmed Bey b. Abdullah nâm kimesneler li ecli’ş-şehâde hâzırûn olup fi’l-vâki‘ müteveffâ-yı mezbûr sıhhatde iken mezbûr Mehmed benim li eb ve üm karındaşım oğludur deyû bizim huzûrumuzda ikrâr edip ve bu ikrâr üzerine musırran vefât etmişdir minvâl-i meşrûh üzre biz şâhidiz şehâdet dahi ederiz dediklerinde şehâdetleri ba‘de’t-ta‘dîl hayyiz-i kabûlde vâki‘ olup mûcebine hükm birle mâ vaka‘a gıbbe’t-taleb kayd şüd. Hurrire fi’t-târihi’l-mezbûr. Şuhûd: Mevlânâ Mehmed Efendi b. Bâli, el-Hâc Mehmed b. Hasan, Hasan b. Abdullah, Şucâ‘ Bey b. Mustafa, el-Hâc Ali b. Mustafa ve gayruhüm