Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 69 Hüküm no: 42 Orijinal metin no: [5b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şem‘î Hatun’un mehir alacağı olduğu Mevlânâ Bayram Halîfe b. Şükrullah ve Mehmed Çelebi b. Hasan nâm kimesneler meclis-i şer‘-i şerîfe hâzırân olup, mahrûse-i Mısır’da bundan akdem fevt olan Mehmed Çavuş b. Şucâ‘’ın zevcesi Fâtıma Hâtun bt. Davud kıbelinden husûs-ı âti’z-zikri da‘vâya vekîl edilen Davud Bey b. Mustafa nâm hasm-ı şer‘î mahzarında ve müteveffâ-yı mezbûrun anası ve vârisi olan fahrü’l-muhadderât Âişe Hâtun bt. Ahmed kıbelinden vekâleti bimâ hüve tarîkü’s-sübût şer‘an sâbit olan umdetü’l-emâcid ve’l-ekârim Ahmed Çelebi b. Mehmed mahzarında ve merhûm-ı mebrûr Hızır Efendi’nin Şeyh Mehmed, el-Hâc Mehmed, Kerime ve Sâliha nâm evlâd-ı sıgārına kıbel-i şer‘den mansûb vasî olan Mehmed Dede b. Ahmed mahzarında, müteveffâ-yı mezbûrun zevcesi zahrü’l-muvakkarât Şem‘î Hâtun bt. Sinan kıbelinden husûs-ı âti’z-zikre vekâleti bimâ hüve tarîkü’s-sübût şer‘an sâbit olan bâ‘is-i hâze’l-kitâb Seyyid Abdi b. Seyyid Mustafa’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezbûrenin, müteveffâ-yı merkūmun zimmetinde, nikâhında ma‘kūdun-aleyh olan mehr-i müecceli cihetinden râyicü’l-vakt beş bin akçe hakkı vardır. Müdde‘iye-i merkūmeye meblağ-ı mezbûru kısmen veya tamâmen ahz ü kabz etmediğine, hibe etmediğine, bi vechin mine’l-vücûh ve sebebin mine’l-esbâb zimmetini ibrâ etmediğine dâir yemîn teklîf olundukda yemîn billâhi’l-aliyyi’l-a‘lâ etmeğin ve şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fi’l-yevmi’r-râbi‘ ve’l-ışrîn min şehri Şa‘bâni’l-mu‘azzam sene hamse ve elf. Şuhûd: Fahrü’l-akrân İbrahim Ağa b. Abdullah, Süleyman Çavuş b. Abdullah, Mustafa Bey b. Abdullah el-Cündî, Mehmed Dede Hallâc, Mehmed Bey b. Seydi ve gayruhüm