Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 69 Hüküm no: 41 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf dükkanın tasarruf hakkının devrinden dolayı alacağın sâbit olduğu (…) nehc-i (…) el-emâcid ve’l-(…) Şeyh Abdülkerim’e ve Sâliha nâm sagīrin (…) olan Mehmed Dede b. Ahmed ve müteveffâ-yı mezbûr (…) bt. Davud nâm hâtun tarafından Mehmed b. Abdullah ve Ahmed b. Mehmed nâm kimesneler şehâdetleri ile şer‘an vekâleti sâbite olan Davud Bey b. Mustafa nâm kimesneler mahzarlarında takrîr-i kelâm ve ta‘bîr merâm edip müteveffâ-yı mezbûrun hazret-i Ebî Eyyûb el-Ensârî mahallâtından Kasımpaşa mahallesi kurbunda vâki‘ merhûm Seydi Bey vakfı’ndan olup inde’l-ahâlî ve’l-cîrân ma‘lûmü’l-hudûd olan bir bâb vakıf dükkânın hakk-ı tasarrufunu beş bin sekiz yüz akçeye müteveffâ-yı mezbûr Mehmed Çavuş’a tefvîz edip meblağ-ı mezbûr hâlen müteveffâ-yı mezbûr Mehmed Çavuş’un zimmetinde bâkī kalmışdır hakkımdır taleb ederim dedikde ba‘de’s-suâl ve’l-inkâr ve akībe’l-istişhâd mevlânâ Mehmed Çelebi b. Hasan ve Mehmed Bey b. Abdullah nâm kimesneler meclis-i şer‘a li ecli’ş-şehâde hâzırân olup istişhâd olunduklarında edâ-i şehâdet-i şer‘iyye edip fi’l-vâki‘ merkūm Hasan Bey müteveffâ-yı merkūmun zikr olunan dükkânında hakk-ı tasarrufunu mezbûr Mehmed Çavuş’a beş bin sekiz yüz akçeye tefvîz edip hâlen meblağ-ı mezbûr müteveffâ-yı mezbûrun zimmetinde bâkī kalmışdır biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye mezbûrânın şehâdetleri hayyiz-i kabûlde vâkı‘a oldukdan sonra mezbûr Hasan müteveffâ-yı mezbûrdan meblağ-ı mezbûru küllen [ve] ba‘zan ahz ü kabz etmediğine mezbûr Hasan Bey’e yemîn teklîf olundukda yemîn billâhi’l-aliyyi’l-a‘lâ etmeğin müteveffâ-yı mezbûr muhallefâtından meblağ-ı mezbûrun edâsına hükm olunup mâ vaka‘a gıbbe’t-taleb kayd olundu. Hurrire fi’l-yevmi’r-râbi‘ ve’l-ışrîn min şehri Şa‘bâni’l-mu‘azzam sene hamse ve elf. Şuhûd: Fahrü’l-akrân İbrahim Ağa b. Abdullah, Süleyman Çavuş b. Abdullah, Mustafa Bey b. Abdullah el-Cündî, Mehmed Dede b. Hallâc, mevlânâ Bayram Halîfe b. Şükrullah ve gayruhüm