Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 68 Hüküm no: 40 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tarla ve çayır mukâtaasından alacağın sâbit olduğu Mahmiye-i Kostantıniyye’de merhûm ve mağfûrun leh Sultan Bayezid Han aleyhi’r-rahmetü ve’r-rıdvân hazretlerinin vakfının câbisi Hüsrev b. Abdullah ve kâtibi Mustafa b. Şaban nâm kimesneler meclis-i şer‘de bundan akdem vefât eden merhûm Mehmed Çavuş’un veresesinden vâlidesi Âişe Hâtun bt. Ahmed nâm hâtun cânibinden bimâ hüve tarîkü’s-sübût şer‘an vekâleti sâbite olan umdetü’l-emâcid ve’l-ekârim Ahmed Çelebi b. Mehmed ve müteveffâ-yı mezbûrun zevcesi Fâtıma Hâtun bt. Davud tarafından şer‘an vekâleti sâbite olan Davud Bey b. Mustafa nâm kimesneler mahzarlarında takrîr-i kelâm edip merhûm Hayreddin Paşa çiftliği kurbunda vâki‘ Debbağ Yunus tarlaları ve çayırları demekle ma‘rûf olup her sene bin dört yüz altmış sekiz akçe mukāta‘a ile müteveffâ-yı mezbûrun tasarrufunda olan tarlaları ve çayırlarının üç sene mukāta‘asını ve bâkiyeden ale’l-hesâb dört bin dört yüz dört akçe eder taleb ederim suâl olunsun dedikde gıbbe’s-suâl mezbûr Ahmed ve Davud Bey müdde‘iyân-ı merkūmânın kelâm-ı meşrûhlarını tasdîk ve tahkīk ettiklerinden sonra merkūmân câbi ve kâtib meblağ-ı mezbûru müteveffâ-yı mezbûrdan küllen [ve] ba‘zan almadıklarına yemîn müteveccih oldukda yemîn billâh ettiklerinden sonra meblağ-ı mezbûrun müteveffâ-yı mezbûrun muhallefâtından edâsına hükm olundu. [Cerâ zâlike ve hurrire] (…) min şehri Şa‘bân. Şuhûd: Fahrü’l-akrân İbrahim Ağa, Süleyman Çavuş b. Abdullah, Mustafa Bey b. Abdullah, Mehmed b. İskender, Ahmed b. Hüseyin