Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 71 Hüküm no: 46 Orijinal metin no: [6a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hatun’un ev satın aldığı (…) Mihriban bt. Abdullah nâm hâtun kendi nefsinden asâleten, Osman ve Ebûbekir b. Nasuh nâm sagīreyne kıbel-i şer‘den mansûb vasî olarak vesâyeten ve müteveffât-ı mezbûrenin zevci Ramazan? b. Mustafa nâm kimesne meclis-i şer‘a hâzırân olup, kendilerine ve sagīreyne müteveffâ-yı mezbûre Meryem Hâtun’dan irs-i şer‘le intikāl eden, mahalle-i mezbûrede vâki‘, tahtânî ve fevkānî iki beyti, mahzeni, su kuyusunu ve helâyı müştemil olup, bir tarafdan Ahmed Çelebi b. Mehmed Çelebi mülkü, etrâf-ı selâsesinden ise tarîk-i âm ile mahdûd olan cemî‘ menzili cümle tevâbi‘ ve levâhıkı ve kâffe-i hukūk ve merâfıkı ile râyicü’l-vakt kırk iki bin akçe semen-i mu‘ayyen-i makbûzla, îcâb kabûl ve teslîm tesellümü hâvî bey‘-i sahîh ile Âişe Hâtun bt. Hacı’ya bey‘ ettiklerini ikrâr ettiler. Müşteriye-i mezbûre kıbelinden kaziyyeyi ikrâra vekâleti sâbit olan fahrü’l-a‘yân Memi Hoca b. Abdülmennân vâki‘ ikrârı vicâhen ve şifâhen tasdîk etti. İşbu mübâya‘a, menzil-i mezbûrun mecâlis-i tâlibin ve mehâfil-i râgibînde müzâyedeye arz edilip semen-i merkūmla müşteriye-i mezbûre üzerinde tekarrür etmesinden ve semen-i mezkûrun udûl-i müslimînin şehâdetleriyle misil mehir olduğunun sübût bulmasından sonra vâki‘ oldu. Vaka‘a’t-tahrîr fî yevmi’l-âşir şehri Recebi’l-mürecceb sene hamse ve elf. Şuhûd: El-Hâc Hasan b. Abdullah, el-Hâc Mehmed b. Bayram, Cafer b. Abdullah, Mustafa b. Abdullah, Hidayetullah b. Mehmed, Ahmed b. Hüseyin, Pîr b. Murad ve gayruhüm