Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 72 Hüküm no: 47 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karamürsel tipi geminin müzâyede ile satıldığı Mahmiye-i Galata hâricinde Mustafa Ağa mahallesinde bundan akdem vefât eden merhûm Mahmud Reis b. Şaban nâm kimesnenin sagīre kızı Emine’ye kıbel-i şer‘den vasiyy-i mansûb olan müteveffâ-yı mezbûrun li eb ve üm karındaşı el-Hâc Ahmed b. el-mezbûr ve müteveffâ-yı mesfûrun zevcesi Fâtıma Hâtun tarafından husûs-ı âti’z-zikri ikrâra şer‘an vekâleti sâbite olan Hüsam Efendi b. Şaban mahfil-i şer‘de el-Hâc Hüseyin b. Ramazan mahzarında asâleten ve vesâyeten ve vekâleten ikrâr ve i‘tirâf edip müteveffâ-yı mezbûrun muhallefâtından yirmi üç zirâ‘ Karamürsel sefînesi sûk-ı sultânîde nidâ olunup bey‘ men yezîd oldukdan sonra rağabât-ı nâs münkatı‘a olup zikr olunan sefîne merkūm el-Hâc Hüseyin üzerinde on dokuz bin akçede karâr edip tâlib-i âhar bulunmamağın sefîne-i merkūmeyi mezbûr el-Hâc Hüseyin’e rızâ üzre füruhtla meblağ-ı merkūm on dokuz bin akçeye bey‘-i bâtt-ı sahîh-i şer‘î ile bey‘ edip kabz ve teslîm-i semen eyledim dediklerinde mukırr-ı merkūmânın vech-i meşrûh üzre olan ikrârını mezbûr el-Hâc Hüseyin kabûl ve tasdîk ettikden sonra sıhhat-i bey‘a ve lüzûm-ı şirâya hükm birle mâ vaka‘a kayd olundu. Hurrire fî 7 şehri Şa‘bâni’l-mu‘azzam sene hamse ve elf. Şuhûd: Hasan b. Abdullah el-Münâdî, el-Hâc Mehmed b. Süleyman, Hasan b. Abdullah, el-Hâc Mustafa el-Münâdî, İbrahim b. Nurullah, Mehmed Trabzonlu ve gayruhüm