Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 79 Hüküm no: 52 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâle intikal eden bağın Keyvan b. Abdullah’a satıldığı Mahmiye-i Galata’da beytülmâl emîni olan fahrü’l-akrân Mehmed Çavuş b. Abdullah ve diğer Mehmed Çavuş b. Bayram nâm kimesne mahfil-i şer‘de Keyvan b. Abdullah tarafından husûs-ı âti’z-zikri tasdîka vekîl-i şer‘îsi olan Mehmed b. Mehmed mahzarında ikrâr-ı şer‘î ve i‘tirâf-ı mer‘î kılıp mukaddemâ Rumeli Hisarı’nda müteveffâ-yı merkūme Şemsi Hâtun bt. Abdullah nâm hâtunun karye-i İstinye’de vâki‘ bir cânibi Mehmed ve bir cânibi Hüseyin ve bir cânibi Hümâ Hâtun ve bir cânibi Hüseyin er-Râcil bağları ile mahdûd olan bağı vâris-i ma‘rûfu olmamağla cümle menkūlâtı beytülmâle âid olup merhûm ve mezbûrenin cemî‘ muhallefâtını kabz ettiğimde ba‘dehû mahdûd-ı mezbûr sûk-ı sultânîde kirâren ve mirâren nidâ olunup bey‘ men yezîd olundukdan sonra rağabât-ı nâs münkatı‘a olup mahdûd-ı mezbûr merkūm Keyvan üzerinde beş yüz akçede karâr ettiği ecilden mahdûd-ı mezbûru merkūm Keyvan’a meblağ-ı mezbûr beş yüz akçeye bey‘-i bâtla bey‘ edip kabz-ı semen-i ma‘dûd ve teslîm-i müsemmen ve mahdûd eyledik ba‘de’l-yevm mahdûd-ı mezbûr merkūm Keyvan’ın mülk-i müşterâsıdır keyfe mâ yeşâ’ mutasarrıf olsun dediklerinde mukırrân-ı mezbûrânın vech-i mezbûr üzre olan ikrârlarını merkūm vekîl bi’l-muvâcehe tasdîk ettikden sonra mâ vaka‘a alâ vukū‘ihî gıbbe’t-taleb kayd-ı sicil olundu. Hurrire fi’l-yevmi’s-sânî min şehri Ramazâni’l-mübârek. Şuhûd: Mahmud b. Abdullah, Mehmed b. Abdullah, Mehmed b. Derviş, Hüseyin b. Abdullah, Mustafa b. Abdullah, Mehmed b. Hasan, Osman b. el-Hâc Pîrî ve gayruhüm