Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 89 Hüküm no: 74 Orijinal metin no: [9a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihri Hatun’un ev satın aldığı Bundan akdem mahmiye-i Galata mahallâtından Okçu Musa mahallesinde sâkine iken vefât eden merhûme Fâtıma bt. Ahmed nâm hâtunun vâlidesi Mihri bt. Abdullah nâm hâtun asâleten ve müteveffât-ı mezbûrenin li eb ve üm karındaşı olan Mustafa b. Ahmed nâm kimesnenin vekîl-i şer‘îsi olan Kamer bt. Abdullah nâm hâtun ve li eb kız karındaşı olan Rahime bt. Ahmed nâm hâtun tarafından husûs-ı âti’z-zikri Receb b. İbrahim ve Hacı Piyâle b. Abdullah şehâdetleri ile şer‘an vekâlet-i sâbite olan el-Hâc İbrahim b. Nureddin nâm kimesneler mahfil-i şer‘de hâfızatü hâze’l-kitâb Mihri bt. Oruc nâm hâtun muvâcehesinde bi’t-tav‘ ve’r-rızâ ikrâr-ı sahîh-i şer‘î edip müteveffât-ı mezbûrenin muhallefâtından sâlifü’z-zikr müvekkillerime irs-i şer‘le intikāl eden muhallefâtdan mahmiye-i mezbûre mahallâtından Câmi‘-i Kebîr mahallesinde vâki‘ hudûdunun bir tarafı el-Hâc Murad b. Abdullah mülküyle ve bir tarafı İsmail b. Musa mülküyle ve bir tarafı tarîk-i âm ile mahdûd ve bir tarafı Şemseddin vakfı ile mahdûd olan bir mahzeni ve bir muhavvatalı iki kenîfi müştemil olan iki bâb fevkānî ve bir tahtânî menzili vekâletim hasebiyle merkūme Mihri Hâtun’a yirmi üç bin nakd-i râyic fi’l-vakt akçeye bey‘-i bâtla bey‘ edip teslîm-i mebî‘ ve kabz-ı semen eyledik ba‘de’l-yevm menzil-i merkūm mezkûre hâtunun mülk-i müşterâsıdır keyfe mâ teşâ’ mutasarrıfe olsun dedikde mukırrûn-ı merkūmûnun vech-i mezbûr üzre olan ikrârlarını mukarrun lehe’l-mezbûre bi’l-muvâcehe kabûl ettikden sonra mâ hüve’l-vâki‘ gıbbe’t-taleb kayd şüd. Hurrire fi’t-târihi’l-mezbûr. Şuhûd: Hüseyin b. Abdullah er-Reisü’s-sultânî, Mehmed Çelebi b. İslâm, el-Hâc Nurullah b. Hüseyin er-Reis, Hüseyin b. Abdullah el-Münâdî, Abdülkādir b. Hacı ve gayruhüm