Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 91 Hüküm no: 78 Orijinal metin no: [9b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey’in Rüstem Çelebi Vakfı’ndan ödünç aldığı Mustafa b. Yusuf ve Hamza b. Abdullah nâm kimesneler meclis-i şer‘a hâzırân olup, Hazret-i Ebî Eyyûb-i Ensârî mahallâtından Kasım Çavuş mahallesinde bundan akdem fevt olan merhûm Hasan Bey’in sagīrine kıbel-i şer‘den mansûb vasî olan Mehmed Çelebi b. Yusuf nâm hasm-ı câhid mahzarında, merhûm Rüstem Çelebi vakfı’na mütevellî olan hâmil-i hâze’l-kitâb Osman Çelebi b. Hamza’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve kemâl-i sıhhatinde bizim yanımızda ve katımızda müdde‘î-i mezbûra karz cihetinden lâzımü’l-edâ ve vâcibü’l-kazâ râyicü’l-vakt iki bin akçe ve müşterâ-yı makbûz çuka bahâsından altı yüz akçe deyni olduğunu ikrâr ve i‘tirâf etti. Karz dışındaki meblağ, 1002 senesi gurre-i şehr-i Muharremi’nden bir sene tamâmına müecceldir. Mezbûr Osman Çelebi’ye meblağ-ı merkūmu bi vechin mine’l-vücûh ve sebebin mine’l-esbâb kısmen veya tamâmen almadığına dâir yemîn billâhi te‘âlâ ettikden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra mûcebince meblağ-ı merkūmun müteveffâ-yı mezbûrun muhallefâtından edâsına hükm edildi. Cerâ zâlike ve hurrire fi’l-yevmi’s-sâmin aşer min şehri Şa‘bâni’l-mu‘azzam sene hamse ve elf. Şuhûdü’l-hâl: İbrahim b. Abdi, Mehmed Bey b. el-Hâc İbrahim, Nebi b. Murad, Mehmed b. Yusuf, Mustafa b. Ali, Hüsrev b. Abdullah, Ahmed b. Hüseyin ve gayruhüm mine’l-hâzırîn