Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 92 Hüküm no: 79 Orijinal metin no: [9b-5, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman’ın oğlu Ömer’e borcu olduğu Cafer b. Abdullah ve Mustafa b. Ali nâm kimesneler meclis-i şer‘-i şerîfe hâzırân olup mahmiye-i Galata mahallâtından Bereketzâde mahallesinde bundan akdem fevt olan Osman’ın Âişe nâm sagīre kızına kıbel-i şer‘den mansûbe vasî olan Şâdıman Hâtun bt. Abdullah nâm husûs-ı âti’z-zikri inkâr eden hasm-ı câhid mahzarında, mahalle-i mezbûrede vefât eden Yasemin bt. Abdullah nâm merhûmenin Ömer b. Osman nâm sagīrine kıbel-i şer‘den mansûb vasî olan hâmil-i hâze’l-kitâb Mehmed b. Veli’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve kemâl-i sıhhatinde bizim yanımızda ve katımızda sagīr-i mezbûr malından ve karz cihetinden üzerinde ve zimmetinde lâzımü’l-edâ ve vâcibü’l-kazâ râyicü’l-vakt sekiz bin akçe lâzımü’l-edâ ve vâcibü’l-kazâ deyni olduğunu ikrâr ve i‘tirâf etti. Vasiyy-i mezbûra meblağ-ı merkūmu bi vechin mine’l-vücûh ve sebebin mine’l-esbâb kısmen veya tamâmen almadığına dâir yemîn billâhi te‘âlâ verildikden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra mûcebince meblağ-ı merkūmun müteveffâ-yı mezbûrun muhallefâtından edâsına hükm edildi. Cerâ zâlike ve hurrire fî yevmi’r-râbi‘ min şehri Ramazân sene hamse ve elf. Şuhûdü’l-hâl: Mevlânâ Mustafa b. Ali, Ahmed b. Hüseyin, Hüsrev b. Abdullah, Mehmed b. Yusuf, Mustafa b. Hızır Ahmed, Nebi b. Murad ve gayruhüm