Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 114 Hüküm no: 106 Orijinal metin no: [14a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nâzenin bt. Abdullah’ın Ahmed Bey’de ödünçten alacağı olduğu Mehmed Çelebi b. Hüseyin ve Kamer Hâtun bt. Mahmud ve Meleksimâ bt. Abdullah nâm kimesneler meclis-i şer‘-i şerîfe hâzırûn olup, Ahmed Bey nâm babası bundan akdem mahmiye-i Galata tevâbi‘inden Beşiktaş kasabası mahallâtından Azeb İskelesi mahallesinde fevt olan Abdi nâm sagīre kıbel-i şer‘den mansûb vasî olan Mehmed Halîfe b. İskender nâm hasm-ı câhid mahzarında, hâmiletü hâze’l-kitâb Nâzenin bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr bizim yanımızda ve katımızda, karz-ı hasen-i şer‘î cihetinden müdde‘iye-i mezbûreye lâzımü’l-edâ ve vâcibü’l-kazâ râyicü’l-vakt bin iki yüz akçe deyni olduğunu ikrâr ve i‘tirâf etti. Müdde‘iye-i merkūme, meblağ-ı mezbûru kısmen veya tamâmen ahz ü kabz etmediğine, hibe etmediğine ve bi vechin mine’l-vücûh ve sebebin mine’l-esbâb ibrâ etmediğine dâir yemîn billâhi te‘âlâ etmeğin ve şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Cerâ zâlike [ve] hurrire fi’l-yevmi’s-sâmin min şehri Şevvâli’l-mükerrem min şühûri sene hamse ve elf. Şuhûd: Es-Sâbikūn