Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 124 Hüküm no: 116 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Evin onarımından doğan alacak talebinin ispat edilemediği Bundan akdem mahmiye-i Galata hâricinde olup kasaba-i Kasımpaşa mahallâtından el-Hâc Hüsrev mahallesinde sâkin iken vefât eden merhûm-ı mağfûrun leh hâssa reislerinden Ali Reis b. Mustafa nâm kimesnenin li eb ve üm karındaşı oğlu ve vârisi olan Emrullah b. İsa nâm kimesne meclis-i şer‘-i şerîf[d]e müteveffâ-yı mezbûrun zevcesi ve vârisesi olan Âişe Hâtun bt. İbrahim mahzarında takrîr-i kelâm ve ta‘bîr merâm edip mahalle-i mezbûrede vâki‘ inde’l-ahâlî ve’l-cîrân ma‘lûmü’l-hudûd olup hâlen mezbûre Âişe Hâtun’un tasarrufunda olan menzilin garb cânibinde vâki‘ olan matbah cidârını müteveffâ-yı mezbûr vefât etmezden mukaddem kendi mâlı ile ta‘mîr ve meremmet edip on bin mikdârı akçe harc ve sarf eylemişdir taleb ederin suâl olunsun dedikde gıbbe’s-suâl mezbûr Âişe Hâtun inkâr ile cevâb vericek müdde‘î-i mezbûrdan sıdk-ı makāline beyyine taleb olundukda beyyineden âciz ve kāsır olup mezbûre Âişe Hâtun’a menzil-i merkūma müteveffâ-yı merkūm Ali Reis bir akçe ve bir habbe harc ve sarf etmediğine ve menzil-i merkūmda vechen mine’l-vücûh alâka ve medhali olmadığına yemîn teklîf olundukda merkūme Âişe Hâtun yemîn billâhi’l-aliyyi’l-a‘lâ etmeğin mâ vaka‘a alâ vukū‘ihî bi’t-taleb ketb olunup yedine vaz‘ olundu. [Fî] târihi’l-mezbûr sene 1005. Şuhûd: Es-Sâbikūn